मुख्यमंत्र्यांच्या दक्षिण-पश्चिम मतदारसंघात काम करण्यास कंत्राटदारांचा नकार

Devendra Fadnavis
Devendra Fadnavis
नागपूर : मुख्यमंत्री देवेंद्र फडणवीस यांच्या दक्षिण-पश्चिम मतदारसंघात काम करण्यास मनपातील कंत्राटदारांनी नकार दिला आहे. जे काम सुरू आहेत, ते वगळता एकही कंत्राटदार नव्याने काम करण्यास तयार नाही. काम झाल्यावर वेगवेगळी कारणे दाखवून बिलातून दहा टक्के कपात करण्यात येत असल्याने कंत्राटदारांनी कामास नकार कळविला आहे.

मुख्यमंत्र्यांच्या मतदारसंघातील कामासाठी कोट्यवधीचा निधी आला आहे. त्यातून अनेक कामांना मंजुरी मिळाली. त्यातील काही कामे सुरूही झाली आहेत. परंतु, बिले मंजूर करताना तिसऱ्या पक्षाच्या तपासणीच्या नावावर दहा टक्के आणि यासोबतच दुसरे कारण सांगून परत दहा टक्के देयकातून कपात करण्यात येत असल्याने एकही कंत्राटदार काम करण्यास तयार नाही. या मतदारसंघात सिमेंटचे रस्ते, सिवर लाइन व डांबरी रस्ते ही कामे प्रामुख्याने करण्यात येत आहेत. आता या कामासाठी कुणीही तयार नाही.

काम मंजूर झाल्यानंतर कार्यादेश मिळाले तेव्हा तपासणी करण्याची विनंती कंत्राटदारांनी केली. मात्र, काम झाल्यावर कामाची तपासणी होत असल्याने कंत्राटदारांमध्ये नाराजीचा सूर आहे. प्रत्येक महिन्यात या मतदारसंघातील कामांसाठी मनपात बैठक होते. त्यावेळी या सर्व बाबी समोर मांडल्या जातात. परंतु, या कामांसाठी विभागाकडूनच योग्यपद्धतीने दरपत्रक तयार करण्यात येत नसल्याने काम करताना कंत्राटदारांना अडचण येत आहे. जुन्या सीएसआरनुसार काही कामे होत आहेत. आता नव्या सीएसआरनुसार कामे देण्यात येत असतानाही कामे घेण्यास कंत्राटदार अनुत्सुक आहेत.

कार्यकर्त्यांकडून दबाव? 

मनपा कंत्राटदार संघटनेते दक्षिण-पश्चिम मतदारसंघात काम करण्यास नकार दिल्याचे पत्रही यासंदर्भात जारी केले. अनेक कामांना दोन वर्षे झाल्यानंतरही डिफेक्ट लायबिलिटी कालावधीअंतर्गत जमा असलेली दहा टक्के रक्कमही मिळत नाही, अशी ओरड आहे. सध्या या मतदारसंघात बॅडमिंटन कोर्ट, सिवरेज लाइन, सिमेंट रस्ते व डांबरी रस्त्यांचे काम आहे. परंतु, कुणीच तयार नसल्याने या मतदारसंघातील कामे ठप्प आहेत. त्यातच हा मतदारसंघ मुख्यमंत्र्यांचा असल्याने भाजपचे कार्यकर्तेही कंत्राटदारांवर दबाव टाकत असल्याच्या तक्रारी आहेत.