नागपूर : उपराजधानी संत्रानगरी म्हणून प्रसिद्ध आहे. नागपुरच्या शिरपेचात आणखी तुरा रोवला जाणार आहे. शहरातील लिंबूवर्गीय फळ संशोधन संस्थेने संत्र्याच्या तीन नव्या प्रजातींचे संशोधन केले आहे. राज्यातील चारही कृषी विद्यापीठांनी या प्रजातींचा नव्या प्रजाती म्हणून स्वीकार केला आहे. यंदाच्या मोसमातील नागपूर जिल्ह्यात या प्रजातींचे पीक घेतले जाणार असल्याची माहिती संस्थेकडून मिळाली आहे.
कटर व्हॅलेन्शिया, फ्लेम ग्रेपफ्रुट आणि एनआरसीसी पुम्मेलो-५ अशी या तिन्ही प्रजातींची शास्त्रीय नावे आहेत. या तिन्ही प्रजाती बियारहित आहेत. २०१६ साली या प्रजातींवरील संशोधनास सुरुवात झाली. अद्याप या प्रजातींना बाजारात मान्यता मिळालेली नाही. ही मान्यता देण्याचा अधिकार हा लिंबूवर्गीय फळ संशोधन संस्थेला नसून तो केवळ राज्याच्या प्रजाती मान्य समितीला आहे. परंतु राज्यातील चारही कृषी विद्यापीठांनी या प्रजातींना हिरवा कंदील दिला आहे. त्यामुळे ही समितीसुद्धा लवकरच या प्रजातींना मान्यता देईल, आशी आशा संशोधन संस्थेचे संचालक एम.एस. लदानिया यांनी व्यक्त केली आहे.
लदानिया पुढे म्हणाले ‘आम्ही या मोसमासाठी या प्रजातींच्या रोपट्याची विक्री सुरू केली आहे. अद्याप आम्ही सुमारे सव्वा लाख रुपयांची रोपटी विकली आहेत. चारही कृषी विद्यापीठांनी या प्रजातींना हिरवा कंदील दिला. त्यामुळे आता या प्रजातींचा खप वाढण्याची आम्हाला आशा आहे.’ ‘यातील कटर व्हॅलेन्शिया हे फळ प्रक्रियेद्वारे तयार करण्यात येणाऱ्या उत्पादनांसाठी महत्त्वाचे मानले जाते. या फळावर सुमारे १० वर्षे संशोधन करण्यात आले. याखेरीज फ्लेम ग्रेपफ्रुट हे बियारहित फळ असल्याने अशा फळांना ग्राहकांची अधिक पसंती ला‌भते. तसेच हे सर्वाधिक रसाळ फळ आहे. याखेरीज एनआरसीसी पुम्मेलो-५ हे फळ अधिक गोड असून याचे वजनसुद्धा अधिक आहे,’ असेही लदानिया यांनी सांगितले.
अधिक वाचा : नागपूर – संततधारेने शहरातील अनेक वस्त्यांमध्ये पाणी
