नागपूर : लोकसभा निवडणुकीचे चार टप्पे पार पडले असून अजून तीन टप्पे बाकी आहे. या चार टप्प्यांमध्ये निवडणूक आयोगाने तब्बल तीन हजार कोटींचा काळा पैसा जप्त केला आहे. मत मिळवण्यासाठी पैसे आणि दारुच्या वाटपाचे प्रमाण तसूभर ही कमी झाले नसून त्याच्यात वाढच झाली असल्याचेही स्पष्ट झाले आहे.
भारतातील पहिल्या निवडणुकीपासूनच मतांसाठी मागच्या दाराने पैशांचा आणि दारुचे वाटप केले जातो. या खर्चाचा कोणताही हिशोब दिला जात नाही. हा साराच पैसा काळा पैसा असतो. यामुळेच या अवैध पैसे वाटपावर निवडणूक आयोगाची करडी नजर असते. यावर्षी हे प्रकार कमी करण्यासाठी निवडणूक आयोगाने कठोर पावलं उचलली होती. पण त्याचा काहीच परिणाम झालेला नाही. देशभर सर्वत्रच काळ्या पैशाचा सुळसुळाट आहे. आतापर्यंत ३००० कोटी रुपयांचा काळा पैसा निवडणूक आयोगाने जप्त केला आहे. अजून निवडणुकांचे तीन टप्पे बाकी आहेत. यावेळी १०,००० कोटी रुपये जप्त केले जातील असा अंदाज निवडणूक आयोगाने वर्तवला आहे. एका स्वयंसेवी संस्थेच्या सर्वेक्षणानुसार एकूण काळा पैशाचा आकडा यंदा १ लाख कोटीचा आकडा पार करेल. हा अंदाज खरा ठरल्यास २०१९ची लोकसभा निवडणूक सर्वात महागडी निवडणूक ठरेल.
यावेळी तपास यंत्रणा आणि निवडणूक आयोगामध्ये खटकेही उडत आहेत. तपास यंत्रणांनी निष्पक्ष कारवाई करावी असा सल्लाच निवडणूक आयोगाने तपास यंत्रणांना दिला आहे. आतापर्यंत तपास यंत्रणांनी मध्यप्रदेशात काँग्रेसच्या नेत्यांच्या घरावर तर तामिळनाडूत डीएमके नेत्यांच्या घरावर छापे मारले आहेत.
अधिक वाचा : अपघातमुक्तीसाठी रस्ते अभियांत्रिकी सुधारण्याची गरज
