शहरातील ११ अनधिकृत प्रार्थनास्थळे पाडली

नागपूर : मनपाच्या अतिक्रमणविरोधी पथकाने सोमवारी कारवाई करीत शहरातील अनधिकृत ११ प्रार्थनास्थळे पाडले, तर महाल झोनमधील इतवारी शहीद चौकातील एक जीर्ण घर तोडण्यास सुरुवात केली. न्यायालयाने दिलेल्या निर्देशांनुसार शहरातील अनधिकृत प्रार्थनास्थळांवरील कारवाईने आता वेग घेतला आहे.

आज पाडण्यात आलेल्या अनधिकृत प्रार्थनास्थळांमध्ये राहुलनगरातील हनुमान मंदिर, अंबिकानगरातील नाग मंदिर, एफसीआय गोडाऊनजवळील गोसाई महाराज मंदिर, प्रेमनगर, सुळे महिला शाळेमागील शिव मंदिर व हनुमान मंदिर, परसोडी गावठाण येथील हनुमान मंदिर, आयटी पार्क भिंतीलगतचे शिवमंदिर, जयताळा येथील शिव मंदिर, चुनाभट्टी ओट्याजवळील नाग शिव मंदिर, अजनी रेल्वे कंपाऊंडजवळील हनुमान मंदिर, आदी मंदिरांचा समावेश आहे. कारवाईत लक्ष्मीनगर झोनचे सहायक आयुक्त राजू भिवगडे यांच्या उपस्थितीत नागपूर तहसिलदार कार्यालयातील अधिकारी सुनील साळवे, नायब तहसिलदार योगीता यादव, मंडळ अधिकारी राजेश देठे आदी उपस्थित होते.

दुसऱ्या पथकाने इतवारी शहीद चौकातील रितेश श्रीकृष्णराव पाटील यांचे जीर्ण घर पाडण्याची कारवाई करण्यात आली. १८ जुलै, २०१९ रोजी हे घर पाडण्याची नोटीस बजावण्यात आली होती. परंतु, घर पाडण्याची कारवाई करण्यात न आल्याने मनपाच्या पथकाने ही कारवाई केली. आजच्या कारवाईत इमारतीच्या दुसऱ्या माळ्यायावरील टिनाचे छत व समोरील भागाची व मागील बाजूच्या भिंती पाडण्यात आल्या. सहायक आयुक्त(प्रवर्तन) अशोक पाटील, प्रवर्तन निरीक्षक संजय कांबळे यांच्या मार्गदर्शनात पथकाने ही कारवाई केली.

अधिक वाचा : रात्री उशिरापर्यंत सुरू असलेल्या डीजेला मनाई ; पोलिसांवर हल्ला