नागपूर : नागपूरवरून बेंगळुरूकडे निघालेल्या संघमित्रा एक्स्प्रेसचे कपलिंग तुटल्यामुळे इंजिन गाडीपासून वेगळे झाले. इंजिन व त्याला जोडलेले दोन डबेच पुढे जायला लागले. या प्रकारामुळे रेल्वे प्रवाशांमध्ये खळबळ उडाली. ही घटना भद्रावती- माजरीदरम्यान शुक्रवारी रात्री ८.१५ वाजताच्या सुमारास घडली.
१२२९६ पाटणा- बेंगळुरू संघमित्रा एक्स्प्रेस शुक्रवारी सायंकाळी ६ वाजता नागपूर रेल्वेस्थानकावर आली. दहा मिनिटे थांबून ती पुढील प्रवासाला निघाली. सेवाग्राम रेल्वेस्थानकानंतर गाडी पुढे भद्रावती मार्गाने माजरी रेल्वेस्थानकाकडे जात असताना अचानक डब्याचे कपलिंग निघल्याने इंजिनला लागून असलेले तीन डबे (एस-१ आणि जनरलचे दोन डबे) सोबत घेऊन इंजिन पुढे निघाले. एस-२ पासून उर्वरित जवळपास १८-१९ डबे मागेच राहिले. मागे राहिलेल्या डब्यांचा वेग अचानक कमी झाल्याने त्यातील प्रवाशांना शंका आली. त्यामुळे काही प्रवाशांनी दारातून बाहेर पाहिले असता इंजिन व तीन डबे गाडीपासून वेगळे झाल्याचे लक्षात आले.
मागे राहिलेले डबे थांबताच प्रवासी पटापट खाली उतरले, तर तिकडे इंजिनसोबत गेलेले डबे दोन कि. मी. अंतरावर जाऊन थांबले. विशेष म्हणजे, जे डबे मागे राहिले, त्यात गार्ड होता. लोकोपालयट आणि सहायक लोकोपायलटच्या लक्षात येताच या घटनेची सूचना माजरी रेल्वेस्थानकाला देण्यात आली. लागलीच स्टेशन मास्टर, रेल्वे अधिकारी, कर्मचाऱ्यांनी घटनास्थळी धाव घेतली. त्यानंतर इंजिन मागे घेण्यात आले व अर्धा तासाच्या प्रयत्नानंतर कपलिंग जोडून ही गाडी पुढील प्रवासाला निघाली.
अधिक वाचा : एक लाखाच्या खंडणीसाठी युवकाचे अपहरण
