नागपूर: कलम ३७० हटवण्याच्या भारत सरकारच्या निर्णयाविरोधात जगभरातून सहानुभूती मिळवण्याच्या प्रयत्नात असलेल्या पाकिस्तानला पुन्हा जोरदार झटका बसला आहे. काश्मीरप्रश्नी मध्यस्थी आणि हस्तक्षेपाची आशा बाळगून दारोदारी भटकणारा पाकिस्तान तोंडघशी पडला आहे. संयुक्त राष्ट्रसंघ, चीन आणि अमेरिकेनं मध्यस्थी आणि हस्तक्षेपास नकार दिला असतानाच, रशियानं भारताच्या निर्णयाचे समर्थन केले आहे. जम्मू-काश्मीरसंदर्भात भारतानं राज्यघटनेच्या चौकटीत राहूनच निर्णय घेतला आहे, असं रशियानं म्हटलं आहे.
जम्मू-काश्मीरप्रश्नी हस्तक्षेप करण्याची विनंती पाकिस्ताननं संयुक्त राष्ट्रसंघाकडे केली होती. मात्र, गुरुवारी जम्मू-काश्मीरचा मुद्दा हा उभयंतांचा असल्याचं सांगत मध्यस्थी करण्यास नकार देऊन पाकिस्तानला जोरदार दणका दिला. दुसरीकडे चीननंही पाकिस्तानच्या आशा-अपेक्षांवर पाणी फेरलं. त्यानंतर आता रशियानंही भारताच्या निर्णयाचं समर्थन केलं आहे. रशियाच्या परराष्ट्र मंत्रालयानं यासंदर्भात शनिवारी भूमिका स्पष्ट केली. भारतानं राज्यघटनेच्या अधीन राहूनच जम्मू-काश्मीरचा दर्जा बदलला आणि विभाजन करून दोन केंद्रशासित प्रदेशांची निर्मिती केली. या निर्णयामागील तथ्यांचा खोलवर विचार केल्यानंतरच ही भूमिका घेतली आहे, असं रशियानं स्पष्ट केलं. जम्मू-काश्मीरसंदर्भातील निर्णयामुळं भारत आणि पाकिस्तान तेथील वातावरण बिघडू देणार नाही, अशी अपेक्षाही रशियानं व्यक्त केली.
