पुणे: सोन्याचे दागिने पॉलिश करून देण्यासाठी सराफ व्यावसायिकांनी दिलेले ३५ लाख ८० हजार रूपयांचे दागिने घेऊन कारागीर पळून गेल्याची घटना बुधवार पेठेत उघडकीस आली. या प्रकरणी फरासखाना पोलीस ठाण्यात गुन्हा दाखल करण्यात आला आहे. याबाबत मनोत इंद्रजीत मन्ना (वय ३६, रा. कसबा पेठ) यांनी तक्रार दिली आहे. त्यानुसार मैदुल शेख (वय ३१, रा. गाव चापडना, हुगळी पश्चिम बंगाल) याच्याविरोधात अपहार केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदाराचे सोन्याचे दागिने पॉलिश करून देण्याचे दुकान आहे. तर आरोपी शेख हा त्यांच्याकडे कारागीर म्हणून काम करतो. तक्रारदार यांच्या काही सराफ व्यावसायिकांनी सोन्याचे दागिने पॉलिश करण्यासाठी दिले होते. त्यांनी आरोपी शेख याच्यावर विश्वास ठेवून ते सर्व दागिने त्याच्याकडे दिले होते. मात्र, त्याने दागिने परत न करत दागिने घेऊन पळ काढला. काही वेळ त्याची शोधाशोध केली, पण तो कुठेही सापडला नाही. त्यानंतर मन्ना यांनी पोलीस ठाण्यात धाव घेऊन तक्रार दिली. या प्रकरणी सहायक पोलीस निरीक्षक अभिजित पाटील हे अधिक तपास करत आहेत.
