आई-बाबा, लागा स्वच्छतेच्या कामाला!

१३ ते १९ जानेवारीदरम्यान राबविण्यात येणाऱ्या ‘मम्मी पापा यु टू ’अभियानाच्या पहि... मम्मी पापा यू टू अभियान; एक लाख १५ हजार विद्यार्थ्यांनी केली घोषवाक्यांची निर्मिती

नागपूर

नागपूर- ‘खूबसुरत होगा नागपुर हर छोर, क्यूं की मम्मी-पापा जो मिल रहे हैं सफाई करने के लिए चारो ओर’, ‘आओ मिल कर सबको जगाएं, गंदगी को स्वच्छता से दूर भगाएं’, ‘कदम से कदम और हाथ में हाथ मिलाना हैं, नागपुर को सब से श्रेष्ठ और सुंदर बनाना है’, ‘उरलेले अन्न जमा करीन डब्यात, कचऱ्याची गाडी आली टाकीन हिरव्या डब्यात’, ‘आई-बाबा सांगत्ये मी तुम्हाला, लागा तुम्ही स्वच्छतेच्या कामाला’ अशा एकापेक्षा एक घोषवाक्यांची निर्मिती नागपूर शहरामधील शाळांतील विद्यार्थ्यांनी करून आपल्यातील कल्पकतेचा आणि जागरुकतेचा परिचय करून दिला.

मनपा, शालेय शिक्षण विभाग आणि पोलिस वाहतूक विभागाच्यावतीने आयोजित ‘मम्मी पापा यू टू’ अभियानाचे आयोजन करण्यात आले आहे. यानिमित्ताने १३ ते १९ जानेवारीदरम्यान राबविण्यात येत असलेल्या अभियानाच्या पहिल्या दिवशी शहरातील विद्यार्थ्यांसाठी घोषवाक्य स्पर्धा घेण्यात आली. यात मनपा संचालित शाळांसह एकूण ९२६ शाळांतील एक लाख १५ हजार ५३६ विद्यार्थ्यांनी सहभाग नोंदवित एकापेक्षा एक सरस घोषवाक्यांची निर्मिती केली. हीच घोषवाक्ये घेऊन शहरातील सर्व शाळांतील विद्यार्थी शुक्रवार, १७ जानेवारी रोजी सकाळी ८.३० वाजता मानवी साखळी तयार करणार आहेत. घोषवाक्यांच्या घोषणा देत स्वच्छतेविषयी आणि वाहतूक नियम पाळण्यासंदर्भात जनजागृती करणार आहेत. सोमवारी झालेली घोषवाक्य स्पर्धा शाळास्तरावर दोन गटांत घेण्यात आली. यामध्ये ५ ते ८ एक गट आणि ९ ते १२ वी दुसऱ्या गटाचा समावेश आहे.

या स्पर्धेतून प्रत्येक शाळेतील एक उत्कृष्ट घोषवाक्य निवडण्यात येईल. यानंतर ३० केंद्रावरून केंद्रस्तरावर प्रत्येकी एका केंद्रातून एक अशी ३० घोषवाक्ये निवडण्यात येतील. त्यातून उत्कृष्ट तीन आणि दहा उत्तेजनार्थ बक्षिसांसाठी घोषवाक्यांची निवड महापालिकास्तरावर करण्यात येणार आहे. घोषवाक्य स्पर्धेसाठी प्रथम ११ हजार रुपये, द्वितीय पाच हजार रुपये तर तृतीय तीन हजार रुपयांचे पारितोषिक देण्यात येईल. प्रत्येकी एक हजार रुपयांचे दहा उत्तेजनार्थ पारितोषिकही देण्यात येईल. आज पार पडलेल्या स्पर्धेमध्ये विद्यार्थ्यांचा उत्साह दांडगा होता. शिक्षकांनीही यासाठी परिश्रम घेत प्रत्येक विद्यार्थ्यांना सहभागी करवून घेतले. शिक्षणाधिकारी प्रीती मिश्रीकोटकर यांच्या मार्गदर्शनात आणि मुख्याध्यापकांच्या नेतृत्वात प्रत्येक शाळांतील शिक्षक आणि शिक्षकेतर कर्मचाऱ्यांनी स्पधेच्या यशस्वितेसाठी परिश्रम घेतले.

महापौर, आयुक्तांकडून कौतुक

एखाद्या चांगल्या उद्देशासाठी नागपूर शहरातील सर्वच शाळांतील विद्यार्थ्यांनी इतक्या मोठ्या प्रमाणावर स्पर्धेत सहभागी होण्याची ही पहिलीच वेळ आहे. ‘मम्मी पापा यू टू’ अभियानाच्या निमित्ताने मुख्याध्यापक, शिक्षक आणि विद्यार्थ्यांनी पहिल्याच स्पर्धेला दिलेल्या प्रतिसादाबद्दल महापौर संदीप जोशी आणि आयुक्त अभिजित बांगर यांनी सर्वांचे अभिनंदन करीत कौतुक केले आहे. अभियानात आयोजित सर्वच स्पर्धांमध्ये असाच प्रतिसाद देत नागपूर शहराला स्वच्छ आणि सुंदर करण्यात हातभार लावावा, असे आवाहन त्यांनी केले आहे.

आज पथनाट्य स्पर्धा

‘मम्मी पापा यू टू’ अभियानांतर्गत आज, मंगळवारी पथनाट्य स्पर्धा आयोजित करण्यात आली आहे. ही स्पर्धा प्रथम शाळास्तरावर होईल. यातून केंद्रस्तरावर उत्कृष्ट पथनाट्यांची निवड करून पाठविण्यात येईल. त्यातून उत्कृष्ट पथनाट्यांची निवड शाळास्तरावर करण्यात येईल, अशी माहिती शिक्षणाधिकारी प्रीती मिश्रीकोटकर यांनी दिली.

Comments

comments