घ्या, आता साखर महागली!

भाजीपाल्यांची दरवाढ थांबत नाही तोच आता साखर महागली आहे. गेल्या काही महिन्यांपासून सुरू असलेल्या वेगवेगळ्या वस्तूंच्या दरवाढीचे शुक्लकाष्ठ काही संपलेले नाही.

नागपूर- भाजीपाल्यांची दरवाढ थांबत नाही तोच आता साखर महागली आहे. गेल्या काही महिन्यांपासून सुरू असलेल्या वेगवेगळ्या वस्तूंच्या दरवाढीचे शुक्लकाष्ठ काही संपलेले नाही. त्यामुळे ग्राहकराजा पुरता चिंतेत असून, अचानकपणे झालेल्या साखरेच्या दरातील वाढ सणासुदीचा काळ कटू करणार की काय, असा सवाल उपस्थित झाला आहे.

मकरसंक्रांतीचा सण तोंडावर आहे. या काळात गूळ, साखरेचा उपयोग मोठ्या प्रमाणात होतो. तीळगूळ बनविण्यासाठी मुख्यत्वे गुळाचा वापर होतो. मात्र, तिळाचे इतर पदार्थ वा हलव्याच्या दागिन्यांमध्ये साखरेचा उपयोग करण्यात येतो. या पार्श्वभूमीवर साखरेचे दर प्रतिक्विंटल शंभर रुपयांनी वाढले आहेत. ठोक बाजारातील साखरेची आवक कमी झाल्याचे कारण यामागे सांगण्यात येत आहे. व्यापाऱ्यांनी दिलेल्या माहितीनुसार, यंदा साखरेचे उत्पादन अपेक्षेपेक्षा तीस टक्क्यांनी कमी झाले आहे. परिणामत: बाजारपेठांमध्ये साखरेची आवक रोडावली आहे. ठोक बाजाराप्रमाणेच किरकोळमध्येही साखरेची आवक घटली आहे. किरकोळ बाजाराचा विचार करता साखरेच्या दरात प्रतिकिलो एक रुपयाने वाढ झाली आहे. यामध्ये येत्या काही दिवसांत दोन ते तीन रुपयांची वाढ होण्याची अपेक्षा व्यक्त करण्यात येत आहे.

सोनपापडीमुळे विक्री अधिक

नागपूर आणि सोनपापडी हे समीकरण जुने आहे. शहरातील सोनपापडी संपूर्ण देशभर विकली जाते. सोनपापडीचे कारखाने मोठ्या संख्येने आहेत. त्यामुळे साखरेची विक्री उपराजधानीत अधिक दिसून येते. वाढलेल्या दराचा परिणाम सोनपापडी व्यवसायावरदेखील होणार आहे. प्राप्त माहितीनुसार, सोनपापडी व्यवसायामुळे दिवसाकाठी पन्नास ट्रक साखरची विक्री शहरात होते. इतक्या मोठ्या प्रमाणात साखर खरेदी करणारे नागपूर मध्य भारतातील एकमेव शहर आहे. साखरेच्या वाढलेल्या दरामुळे सोनपापडीसुद्धा महागणार आहे.

वर्षभरात तिसऱ्यांदा वाढ

साखरेच्या दरामध्ये वर्षभरात तिसऱ्यांदा वाढ झाली आहे. यापूर्वी सप्टेंबर २०१९ मध्ये पितृपक्षात साखर दोन रुपयांनी महागली होती. त्यापूर्वी पुरामुळे ऑगस्ट महिन्यात साखरेचे दर वाढले. त्यानंतर आता नववर्षाच्या पहिल्याच महिन्यात दरवाढ झाली आहे. दोन दिवसांपूर्वी ज्या प्रतीच्या साखरेचे दर प्रतिक्विंटल ३४५० ते ३५०० रुपये होते. ते आता ३५५० ते ३६०० रुपये झाले आहेत. अन्य एका चांगल्या प्रतीच्या साखरेचे दर ३५५० ते ३६०० वरून ३६५० ते ३७०० रुपयांवर गेले आहेत.

Comments

comments