नागपूर : मेट्रो रेल्वेचा खर्च कमी व्हावा, यासाठी केंद्र सरकारने लाइट मेट्रो ही नवी संकल्पना आणली. याला बळ देण्याचे काम महामेट्रोने केले असून, न्यू मेट्रो म्हणून टायरवर चालणाऱ्या मेट्रोची आणखी एक नवी संकल्पना मांडण्यात आली. या मेट्रोचा एका किलोमीटरमागे खर्च २५० कोटींवरून ७० कोटींवर आला असून, नाशिकमध्ये हे मॉडेल राबविले जाणार असल्याचे महामेट्रोकडून सांगण्यात आले.
मेट्रो रेल्वेचे जाळे देशभर विणण्यासाठी केंद्र सरकारने पुढाकार घेतला आहे. महाराष्ट्रातील महानगरात मेट्रो धावावी, यासाठी महामेट्रो विविध प्रकल्प राबवित आहे. मात्र मेट्रोचा वाढता खर्च कमी करण्याचे मोठे आव्हान यंत्रणेपुढे होते. यावर तोडगा म्हणून नुकताच केंद्र सरकारने लाइट मेट्रो ही संकल्पना आणली. केंद्र सरकारच्या ‘लाइट मेट्रो’ या संकल्पनेनुसार मेट्रोचा प्रत्येक किलोमीटरमागे खर्च २५० कोटींहून १६० कोटींवर आला. यापुढे तयार होणारी मेट्रो ही लाइट मेट्रो असावी, अशा सूचनाही देशभरातील सर्व एमडी यांना प्राप्त झाल्या आहेत.
खर्च कमी करण्यासाठी सूचना
-सर्व मेट्रो अॅड ग्रेड (जमीन पातळीवर) बनविण्यात यावी.
-या मेट्रोला सुरक्षा भिंत तयार करण्यात यावी.
-कमी जागेत फ्लॅटफॉर्म तयार करा.
-वीजपुरवठा २५ केव्ही ऐवजी ६५० डीसीचा हवा.
महामेट्रोची ‘न्यू मेट्रो’ नाशिकला
महामेट्रोने यापुढे जाऊन एक संकल्पना मांडली आहे. ‘टायरवाली मेट्रो’ असे त्याचे स्वरूप असून मंत्रालयात या नव्या संकल्पनेचे सादरीकरणही करण्यात आले. यापुढे तयार होणाऱ्या मेट्रो या टायरवरच असाव्या असाही विचार मांडण्यात आला आहे. यामुळे मेट्रोची किंमत केवळ किलोमीटरमागे ७० कोटी असणार आहे.
केंद्र सरकारच्या लाइट मेट्रोनुसार अॅड ग्रेड मेट्रो बनविली तर त्यासाठी भूसंपादनाचा प्रश्न निर्माण होऊ शकतो. सर्व्हिस रोडसाठी अधिक जागा लागू शकते. त्यामुळे यावर मात करण्यासाठी महामेट्रोने नाशिकमध्ये अलीवेटेड मेट्रो (वरून धावणारी) तयार करण्याचे ठरविले. तसा उल्लेख डीपीआरमध्ये करण्यात आला आहे. ही मेट्रो टायरवाली असून इकडे तिकडे पळू नये, यासाठी विशिष्ट व्यवस्था करण्यात येणार असल्याचे महामेट्रोकडून सांगण्यात आले.
इलेक्ट्रिक बसही होणार चार्ज
न्यू मेट्रो या संकल्पनेनुसार प्रकल्प साकारताना दोन दोन किलोमीटरच्या अंतरावर क्रॉस फ्लायओव्हरला जोडण्यात येणार आहे. यात इलेक्ट्रिक बस या मार्गाने फ्लायओव्हरवर चढून तिथे ही बस चार्ज करण्याची सुविधाही उपलब्ध करून देण्यात येणार असल्याचे महामेट्रोने सांगितले. मेट्रोसाठी १६ टनचा एक्सल लोड लागतो. मात्र, या न्यू मेट्रोमध्ये एक्सललोड केवळ १० टनांचा राहणार आहे. कॉंक्रीट रोडवर ही मेट्रो धावणार असल्याचे महामेट्रोने सांगितले.
अधिक वाचा : नागपूर : म्हातारपण दाखविणारे अॅप एका दिवसात व्हायरल
