नागपूर: वर्धा मार्गावर रिच-१ मध्ये मेट्रो सेवा सुरू झाली असून, हिंगणा मार्गावरील रिच-३ मध्ये लवकरच मेट्रो प्रवासी सेवा सुरू करण्यात येणार आहे. याची तयारी म्हणून येत्या १५ ऑगस्टपासून मेट्रोची हिंगणा मार्गावर ट्रायल सुरू होणार असल्याचे महामेट्रोकडून सांगण्यात आले.
वर्धा मार्गावर मेट्रो सेवा सुरू असून लवकरच हिंगणा मार्गावर मेट्रो सेवा सुरू करण्यासाठी महामेट्रोची यंत्रणा कामाला लागली आहे. अवघ्या १४ महिन्यांच्या कालावधीत या रिचमधील ११ कि. मी. ट्रॅक कास्टिंगचे कार्य पूर्ण करण्यात आले. ओएचई केबलचे कार्य अंतिम टप्प्यात असून लवकरच या ठिकाणी विद्युत लाइन चार्ज केली जाणार असल्याचे महामेट्रोकडून सांगण्यात आले.
मेट्रो रेल्वे चालविण्यासाठी ओएचई विद्युत केबल महत्त्वाची भूमिका पार पाडणार आहे. नागपूर मेट्रो रेल प्रकल्पामध्ये १०८० ग्रेडचे हेड हार्डनड रेल वापरण्यात आले आहे. १०८० ग्रेडचे हेड हार्डनड रूळ अत्याधुनिक पद्धतीने बनविल्या जाते ज्यामध्ये रुळाच्या वरील भागावर बळकट बनविण्याकरिता विशेष लक्ष दिल्या जाते. यामुळे रुळाचे आयुष्य वाढते.
आरडीएसओने मेट्रोच्या कामासाठी ६० किलो १०८० एचएच रूळ चा वापर करणे अनिवार्य केले आहे. भारतातील सर्व मेट्रोमध्ये याचा वापर करण्यात आला आहे. रुळाचे हेड हे हार्ड म्हणजेच कडक असते जे की रेल्वेच्या चाकांना आधार देते व स्थिरता प्रदान करते. एक किलोमीटरचा ट्रॅक निर्माण करण्याकरिता १२० टनच्या रेलची आवश्यकता असते.
इतर मेट्रोमध्ये रुळाची लांबी १८ मी आहे, मात्र नागपूर मेट्रोसाठी वापरण्यात आलेले रूळ २५ मी. लांबीचे आहेत. नागपूर मेट्रोने रशियावरून या रूळाची आयात केली आहे.
अधिक वाचा: गडकरी प्रवास करत असलेले इंडिगोचे विमान रोखले
