नागपुर: ‘भाजप बायोडाटावाला पक्ष नाही, अनेकांची जन्मकुंडली एकाकडून नाही तर, अनेक पंडितांकडून करण्यात येते. कार्यकर्त्यांचे दोनच डोळे असतात. मात्र, आपल्याकडे हजारो डोळ्यांचे लक्ष आहे’, अशा शब्दांत भाजपचे राष्ट्रीय कार्याध्यक्ष जगत प्रकाश नड्डा यांनी विधानसभा निवडणुकीतील इच्छुकांना सुनावले.
कार्याध्यक्षपदाची सूत्रे स्वीकारल्यानंतर पहिल्यांदाच संघभूमीत आलेले नड्डा यांच्या उपस्थितीत भाजपची संकल्प रॅली बुधवारी सुरेश भट सभागृहात आली. यावेळी बोलताना त्यांनी सरकारच्या कामाचा लेखाजोखा मांडून पक्ष कसा सर्वोच्च आहे, हे इच्छुकांना समजावून सांगितले. केंद्रीय मंत्री नितीन गडकरी, संघटन सरचिटणीस व्ही. सतीश, प्रदेश प्रभारी सरोज पांडे, प्रदेश संघटन सरचिटणीस विजय पुराणिक प्रामुख्याने उपस्थित होते.
मला भेटण्यासाठी कुणी येत असल्यास बुथचा अभ्यास करून यावे. बुथ म्हणजे फक्त रहिवासी क्षेत्रातील एका बुथवरील महिला व पुरुषांची आकडेवारी नव्हे. मतदारसंघातील सर्व बुथ सविस्तर माहिती घेऊनच या. माझे काय होईल, हा विचार करणे सोडून द्या. पक्षाचे कसे होईल, याचा विचार करा. पक्षाने आपल्याला काय दिले, याऐवजी पक्षाला आपण काय देऊ शकतो, हे लक्षात घ्या, अशा कानपिचक्याही नड्डा यांनी दिल्या.
संघटनात्मक कामासाठी नितीन गडकरी यांचा आपल्यावर प्रभाव आहे, अशी कबुली देऊन नड्डा म्हणाले, ‘गडकरी यांनी मला संघटनेसाठी दिल्लीत नेले. कम्युनिस्ट पक्ष वगळता भाजपच विचारानुसार राजकारणाशी जुळलेली आहे. इतर पक्ष भरटकले आहेत. त्यात घराणेशाहीचा वाद आहे. भाजपची सदस्यसंख्या ५४ दिवसांत १७ कोटींपर्यंत पोहोचली. जगातील १९३ देशांपैकी सात देशांची लोकसंख्या वगळून इतर देशांची जितकी लोकसंख्या नाही, तितके भाजपचे सदस्य आहेत. तीन तलाक, कलम ३७० रद्द करणे या निर्णयांबाबत माहिती देऊन येत्या निवडणुकीत हे मुद्दे प्रखरतेने मांडण्याचे संकेत त्यांनी दिले.
पक्षात कुणाचा कोटा नाही व हा कोटावाला हा पक्ष नाही. एकाची उमेदवारी निश्चित होईपर्यंत सर्व इच्छुकांनी आपली बाजू मांडावी. मात्र, एकदा उमेदवार जाहीर झाले की सर्वांनी पक्षाचा झेंडा घेऊन त्यांच्या विजयासाठी पाठीशी उभे व्हावे, असे आवाहन नितीन गडकरी यांनी केले. लोकसभा निवडणुकीत कमी पडलो अशा ठिकाणी अधिक प्रभावीपणे काम करा, राज्यात परत पक्षाची सत्ता येईल, असा विश्वास सरोज पांडे यांनी व्यक्त केला.
व्यासपीठावर पालकमंत्री चंद्रशेखर बावनकुळे, कृषिमंत्री अनिल बोंडे, आदिवासी विकासमंत्री अशोक उईके, राज्यमंत्री रणजित पाटील, माजी केंद्रीय राज्यमंत्री हंसराज अहिर, विदर्भ वैधानिक विकास मंडळाचे अध्यक्ष चैनसुख संचेती, माजी खासदार दत्ता मेघे, अजय संचेती यांच्यासह पक्षाचे खासदार, आमदार, पदाधिकारी उपस्थित होते. आमदार प्रा. अनिल सोले यांनी संचालन केले.
युती होईल असे वाटते
‘भाजप-सेनेची युती होणार आहे’, ‘होईल…… असे वाटते’,अशी भूमिका नितीन गडकरी यांनी हसतहसत मांडली. त्यांचा ‘युती’बाबतचा ‘टोन’ बघून सभागृहात खसखस पिकली. विदर्भातील ६२ जागांवरही काँग्रेस-राष्ट्रवादीचा पराभव करण्यासाठी कार्यकर्त्यांनी सज्ज व्हावे. कुणालाही उमेदवारी मिळाली तरी, मुख्यमंत्री देवेंद्र फडणवीस यांच्या नेतृत्वाखाली विदर्भातील सर्व जागांवर विजय मिळवून दुसऱ्यांदा सत्ता स्थापन करण्यासाठी हातभार लावावा, असे आवाहनही गडकरी यांनी केले.
जंगी स्वागत
जे.पी. नड्डा यांचे बुधवारी सकाळी येथे आगमन झाले. विमानतळावर जंगी स्वागत केल्यानंतर पक्षाच्यावतीने ‘भारत माता की जय’, ‘भारतीय जनता पक्षाचा विजय असो’, अशा घोषणा देत रॅली काढण्यात आली. शहराध्यक्ष प्रवीण दटके यांच्या नेतृत्वाखाली मोठ्या प्रमाणात कार्यकर्ते आले होते. दुचाकी चालकांच्या डोक्यावर हेल्मेट नसल्याची चर्चा दिवसभर चालली. नड्डा यांच्यासोबत आलेल्या नितीन गडकरी यांनी विमानतळावर त्यांचे स्वागत केले. यावेळी विदर्भाचे संघटन सचिव डॉ. उपेंद्र कोठेकर, जिल्हाध्यक्ष डॉ. राजीव पोतदार, प्रदेश प्रवक्ते आमदार गिरीश व्यास, सुधाकर देशमुख, कृष्णा खोपडे, विकास कुंभारे, सुधाकर कोहळे, डॉ. मिलिंद माने, प्रवक्त्या अर्चना डेहनकर, अशोक मेंढे, सुभाष पारधी, धर्मपाल मेश्राम, चंदन गोस्वामी आदी उपस्थित होते. नड्डा यांनी आगमनानंतर दीक्षाभूमीचे दर्शन घेतले. आद्य सरसंघचालक डॉ. हेडगेवार यांच्या समाधीचे दर्शन घेऊन आदरांजली अर्पण केली. जे.पी. नड्डा यांनी मेडिकल परिसरात दीनदयाल थाली केंद्रास भेट दिली. महापालिकेतील सत्तारुढ पक्षनेते व सरचिटणीस संदीप जोशी यांच्या उपक्रमाचे त्यांनी कौतुक केले. दुपारी देवेन दस्तुरे व रात्री माजी खासदार अजय संचेती यांच्या निवासस्थानी त्यांनी भेट दिली. या दौऱ्यात नड्डा यांनी माध्यमांशी संवाद साधण्याचे टाळले.
