नागपूर : अपघात असो वा कोणतीही नैसर्गिक आपत्तीचा प्रसंग. पोलिस, अग्निशमक विभागाचे कर्मचारी आणि राज्य राखीव पोलिस दलाचे जवान घटनास्थळी पोचतात. अशा वेळी अनेकदा गोल्डन अवरही वाचविता येत नाही. मुळात अशा वेळी काय करावे, हे देखील अनेकांना माहित नसते. नेमकी हीच गरज लक्षात घेता इंडियन मेडिकल असोसिएशन पुढील वर्षभरात या तिन्ही दलांना कार्डिओ पल्मनरी रिसकीकेशन अर्थात जीव वाचविण्याचे सिपीआर प्रशिक्षण देणार आहे, अशी माहिती टीम आयएमएचे नवे अध्यक्ष डॉ. कुश झुनझुनवाला यांनी गुरुवारी येथे दिली.
आयएमएच्या नव्या टीमचे येत्या रविवारी २१ एप्रिलला पदग्रहण होणार आहे. त्यानिमित्त पत्रकारांशी साधलेल्या संवादात डॉ. झुनझुनवाला यांनी ही माहिती दिली.
हृदयविकार अथवा अपघाताच्या ठिकाणी एखाद्याची हृदयक्रिया मंद झाल्यानंतर गोल्डन अवरमध्ये उपचार मिळायला हवेत, असे नमूद करीत डॉ. झुनझुनवाला म्हणाले, एकट्या नागपूर जिल्ह्यात पोलिस दलात १६ हजार पोलिस अहोरात्र झटत असतात. त्यापैकी अडिच हजार पोलिस शहरात कार्यरत आहेत. कुठेही, कसलीही घटना घडली तर हे पोलिस घटनास्थळी धावून जातात. त्यांना अशा वेळी हृदयक्रिया पुन्हा सुरू करण्याचे प्रशिक्षण दिले तर अनेक जीव वाचविणे शक्य आहे. त्यामुळे आयएमएची टीम पोलिसांना झोननिहाय सीपीआरचे प्रशिक्षण देईल. पुढच्या टप्प्यात अग्निशमक विभागाचे कर्मचारी आणि नंतर राज्य राखीव पोलिस दलातल्या जवानांना हे प्रशिक्षण दिले जाणार आहे. या खेरीज आयएमए शाळा आणि महाविद्यालय स्तरावर इट इंडिया राईट हे मिशनही राबविणार आहे. आहारातील साखर, मीठ आणि तेलाच्या अमर्याद वापरामुळे आजारांना निमंत्रण मिळते. ते टाळण्यासाठी शाळा आणि महाविद्यालय स्तरावर आहारातील या बाबींचे प्रमाण कमी व्हावे, यासाठी हे मिशन राबविले जाणार आहे.
यावेळी माजी अध्यक्ष आणि नव्या टीममधील जनसंपर्क अधिकारी डॉ. संजय देशपांडे म्हणाले, ही आयएमए केवळ डॉक्टरांच्या हितासाठी झटणारी संघटना नाही तर तीची जनतेच्या आरोग्याशीही बांधिलकी आहे. त्यामुळे आगामी काळात ज्येष्ठांसाठी क्लब, जेरियाट्रिक मॉड्यूल, माजी पदाधिकाऱ्यांच्या अनुभवांचे आदानप्रदान व्हावे यासाठी पब्लिक फोरम असेही कार्यक्रम राबविले जाणार आहेत.
रविवारी पदग्रहण
टीम आयएमच्या सचिवपदी डॉ. मंजूषा गिरी, कोषाध्यक्षपदी डॉ. आलोक उमरे, उपाध्यक्ष डॉ. राफत खान, डॉ. प्रकाश देव, सहसचिवपदी डॉ. अर्चना कोठारी, डॉ. अनिरुद्ध देवके हे देखील पदभार स्वीकारणार आहेत. यावेळी आयएमएचे राज्य अध्यक्ष डॉ. होजी कपाडिया, मॅटचे न्या. अंबादास जोशी, पोलिस आयुक्त डॉ. भूषणकुमार उपाध्याय, माजी राज्य अध्यक्ष डॉ. वाय. एस. देशपांडे, आमदार डॉ. मिलींद माने, आयएमएचे पेट्रन डॉ. अशोक अढाव आदी प्रामुख्याने उपस्थित राहणार आहेत.
अधिक वाचा : गर्लफ्रेण्डला फिरविण्यासाठी वाहनचोरी
