नागपूर : नागपुरातील वाहतूक सुरळीत व्हावी यासाठी विकास आराखड्यानुसार रस्ते मोठे करण्याचे कार्य सुरू आहे. जुना भंडारा रस्त्याचे कार्य अनेक वर्षांपासून रखडले होते. परंतु आता व्यापाऱ्यांच्या सहकार्याने नवीन बाजारांचा विकास करीत जुन्या भंडारा रस्त्याच्या रुंदीकरणाचे कार्य लवकरच सुरू होईल. खऱ्या अर्थाने लोकसहभागामुळे हा विकास होत असल्याचे प्रतिपादन केंद्रीय भूपृष्ठ वाहतूक मंत्री नितीन गडकरी यांनी केले.
मच्छीसाथ तीन नल चौक येथील मटन मार्केटच्या लोकार्पणाप्रसंगी ते बोलत होते. यावेळी मुख्यमंत्री देवेंद्र फडणवीस, राज्याचे ऊर्जामंत्री तथा नागपूर जिल्ह्याचे पालकमंत्री चंद्रशेखर बावनकुळे, महापौर नंदा जिचकार, मध्य नागपूरचे आमदार विकास कुंभारे, उपमहापौर दीपराज पार्डीकर, माजी आमदार मोहन मते, माजी महापौर तथा ज्येष्ठ नगरसेवक प्रवीण दटके, नगरसेवक प्रवीण भिसीकर, माजी नगरसेवक बंडू राऊत उपस्थित होते.
पुढे बोलताना ना. नितीन गडकरी म्हणाले, जुन्या भंडारा रस्त्याच्या रुंदीकरणासाठी केंद्रीय रस्ते निधीतून १०० कोटी देण्यात आले आहे. रुंदीकरण होताना कोणाचे नुकसान होऊ नये, व्यवसाय बंद होऊ नये म्हणून जमीन अधीग्रणासाठी राज्य शासनाने जुन्या भंडारा रोडसह सहा रस्त्यांसाठी नगरोत्थान अंतर्गत ४५० कोटींचा निधी विशेष बाब म्हणून मंजूर केला आहे. व्यापाऱ्यांसाठी हरिहर नगर येथे धान्यगंज मार्केट बांधण्यात आले आहे. कळमना येथेही नासुप्र तर्फे बाजार विकसित करण्यात येत आहे. येथील व्यापाऱ्यांना आपला व्यवसाय तेथे हलविल्यास त्यांच्या व्यवसायात वृद्धी होईल, असा विश्वास त्यांनी यावेळी दिला.
मुख्यमंत्री देवेंद्र फडणवीस म्हणाले, मच्छीसाथ येथे स्वच्छ आणि सुंदर मटन मार्केट असावे अशी येथील विक्रेत्यांची जुनी मागणी होती. या मागणीला मान्य करुन येथे सुंदर मटन मार्केट उभारण्यात आले आहे, याचा आनंद आहे. गेल्या काही वर्षांत मध्य आणि पूर्व नागपूरमधील विकासकामांना गती मिळाली आहे. यामुळे केवळ पश्चिम नागपूरचा विकास होतो, पूर्व-मध्यकडे कुणी लक्ष देत नाही, असे कुणीही म्हणणार नाही, असेही ते म्हणाले.
प्रास्ताविक उपमहापौर दीपराज पार्डीकर यांनी केले. तत्पूर्वी मुख्यमंत्री देवेंद्र फडणवीस व केंद्रीय मंत्री नितीन गडकरी यांच्या हस्ते फीत कापून मटन मार्केटचे उद्‌घाटन व लोकार्पण करण्यात आले. तरुण बाल गणेश मंडळाच्या वतीने सर्व नेत्यांचा पुष्पहार घालून सत्कार करण्यात आला. कार्यक्रमाला परिसरातील व्यापारी, नागरिक मोठ्या संख्येने उपस्थित होते.
४२ मटन विक्रेते आणि ३२ मासोळी विक्रेते
मुख्यमंत्री देवेंद्र फडणवीस आणि केंद्रीय मंत्री नितीन गडकरी यांच्या हस्ते लोकार्पण करण्यात आलेल्या मटन आणि मासोळी मार्केट जमिनीचे एकूण क्षेत्रफळ १५३७ चौ.मी. असून तयमजला व पहिला मजला यांचे एकूण बांधकाम क्षेत्रफळ ७३८.०१ चौ.मी. इतके आहे. तळमजल्यावर ४८ दुकान-ओटे असून पहिल्या मजल्यावर ३८ दुकान ओट्यांची रचना करण्यात आली आहे. सदर बांधकामासाठी १ कोटी ४७ लाख इतका निधी खर्च झाला आहे. स्वच्छतेकरिता येथे २४ तास मुबलक पाणी पुरवठा, खेळती हवा आणि उजेड राहील, अशी व्यवस्था करण्यात आली आहे. मटन व मासोळी मार्केटला खाटिक समाजाचे पूजनीय ‘श्री संत उपासराव महाराज’ यांचे नाव देण्याची मागणी खाटिक समाज व व्यावसायिकांची आहे. दुकान-ओट्यांचे वाटप व व्यवस्थापन बाजार विभाग मनपा व विक्रेते यांच्या समन्वयाने करण्यात येईल.
अधिक वाचा : नागपूर शहरातील प्रकल्पांना गती द्या : केंद्रीय मंत्री नितीन गडकरी यांचे निर्देश
