नागपूर : ग्राहकांच्या दस्तऐवजाचा वापर करून ३५ लाखांचे कर्ज काढून इतवारीतील आंध्रा बँकेची फसवणूक करण्यात आली. बँकेचे व्यवस्थापक आनंद निंबाजी तुपे रा. खामला यांनी दिलेल्या तक्रारीवरून लकडगंज पोलिसांनी बँकेच्या सहायक व्यवस्थापक अनघा निखिल भुसारी ( वय ३४, रा. प्रसादनगर, जयताळा), अमोल रवीकिरण कुंभारे रा. हसनबाग, मंगेश रंजित जगताप ( वय २८, रा. रचना युतिका अपार्टमेंट), या तिघांविरुद्ध फसवणुकीचा गुन्हा दाखल केला आहे.
पोलिसांनी दिलेल्या माहितीनुसार, ऑगस्ट २०१७ मध्ये अमोल व मंगेश या दोघांनी अनघा भुसारी यांच्या मदतीने वृत्तपत्रात कर्जाची जाहिरात दिली. ग्राहकांनी कर्जासाठी अमोल व मंगेश या दोघांकडे दस्तऐवज जमा केले. मात्र कालातरांने कर्ज नामंजूर झाल्याचे त्यांनी ग्राहकांना सांगितले. त्यानंतर याच दस्तऐवजाद्वारे तिघांनी बनावट ग्राहक उभे करून लाखो रुपयांचे वाहन, गृह व मुद्रा कर्ज घेतले. दरम्यान, धर्मा पांडे यांना गृहकर्ज हवे होते. त्यांनी बँकेत अर्ज केला. त्यांचे ‘सिबिल’तपासले असता त्यांनी आंध्र बँकेतून ३५ लाखांचे कर्ज घेतल्याचे समोर आले. पांडे यांना धक्का बसला. त्यांनी आंध्र बँकेत चौकशी केली. बनावट व्यक्ती उभा करून त्यांच्या नावे कर्ज काढण्यात आल्याचे निष्पन्न झाले. त्यानंतर व्यवस्थापक आनंद तुपे यांनी लकडगंज पोलिसांत तक्रार केली. पोलिसांनी फसवणुकीचा गुन्हा दाखल करून तपास सुरू केला. वृत्त लिहिपर्यंत तिघांनाही अटक करण्यात आली नव्हती.
कोट्यवधीचे कर्ज
या तिघांनी जाहिरातीद्वारे जमा केलेल्या दस्तऐवजाच्या आधारे आंध्रा बँकेत बनावट ग्राहक उभे करून कोट्यवधी रुपयांचे कर्ज घेतल्याची माहिती आहे. याप्रकरणाचा तपास सुरू असून फसवणुकीचा आकडा वाढू शकतो,अशी शक्यता पोलिसांनी वर्तविली आहे.या प्रकरणाचा तपास आर्थिक गुन्हे शाखेकडे जाण्याची शक्यता आहे.
अधिक वाचा : नागपूर – कळमन्यात लुटारुंचा हैदोस
