नागपूर : बसपाने नागपूर लोकसभा मतदारसंघाचे उमेदवार व मनपातील गटनेते मोहम्मद जमालसह पक्षाचे प्रदेश सचिव नागोराव जयकर यांच्यासह सोलापूरचे उमेदवार तसेच औरंगाबाद व सोलापूर महापालिकेतील प्रत्येकी एक नगरसेवकांस मतमोजणीच्या एका दिवसानंतर तडकाफडकी पक्षातून काढल आहे. पक्षविरोधी कारवाई केल्याचा ठपका ठेवत ही कारवाई करण्यात आली आहे. पक्षाचे प्रदेश प्रभारी व राज्यसभेचे खासदार अशोक सिद्धार्थ व प्रभारी प्रमोद रैना यांनी तातडीने यासंदर्भात निर्देश दिले. त्यानुसार प्रदेशाध्यक्ष सुरेश साखरे, प्रभारी प्रा. ना. तु. खंदारे यांनी तातडीने यासंदर्भातील पत्र जारी केले. या कारवाईमुळे अनेकांच्या भुवया उंचावल्या असून, पक्षात खळबळ उडाली आहे.
मोहम्मद जमाल हे यावेळी नागपूर लोकसभा मतदारसंघाचे उमेदवार होते. त्यांना ३१ हजारांवर मते मिळाली. पक्षाला आजवर मिळालेल्या उमेदवारांपेक्षा कमी मते मिळाली. ते पक्षाचे मनपातील गटनेतेही आहेत. ते पक्षाचे कॅडर म्हणून ओळखले जातात. त्यांच्या पत्नीही बसपाच्या गेल्यावेळी नगरसेविका होत्या. पक्षाने त्यांना यावेळी निवडणुकीच्या रिंगणात उतरविले होते. त्यांच्यासोबतच पक्षात एका दशकाहून अधिक काळ काम करणारे व विद्यमान प्रदेश सचिव नागोराव जयकर यांनाही तडकाफडकी पक्षातून बाहेरचा रस्ता दाखविण्यात आला. जयकर हे यापूर्वी जिल्हाध्यक्ष होते. या दोघांसोबतच सोलापूर लोकसभा मतदारसंघातील बसपाचे उमेदवार राहुल सरोदे यांनाही पक्षातून काढले. त्यांनी ऐन निवडणुकीतून माघार घेतली होती. औरंगाबाद महापालिकेतील बसपाचे नगरसेवक महेंद्र सोनवणे, सोलापूर मनपातील नगरसेवक आनंदा चंदनशिवे यांच्यावरही पक्षविरोधी कारवाईचा ठपका ठेवत पक्षातून काढण्यात आले.
बसपाचे उमेदवार मोहम्मद जमाल हे उमेदवारी अर्ज भरण्यापूर्वी भाजपच्या संपर्कात असल्याची जोरदार चर्चा होती. काहिंनी तर गडकरी यांच्या निवासस्थानातून बाहेर पडतानाचे त्यांचे फोटो व्हायरलही केले होते. जयकर यांची भूमिकाही संपूर्ण निवडणूक काळात संशयास्पद असल्याचे पक्षातील कार्यकर्ते सांगत होते. त्यामुळे पक्षाने निवडणुकीची प्रक्रिया पूर्ण होण्याची प्रतीक्षा केली. गुरूवारी मतमोजणी पार पडल्यानंतर शुक्रवारी यासंदर्भातील आदेश पक्षाच्या नेत्यांनी प्रदेशाध्यक्ष व प्रदेश प्रभारींना दिले. त्यानंतर जमाल, जयकरांसह एकूण पाच जणांची पक्षातून हकालपट्टी करण्यात आल्याचे पत्र प्रसिद्धीस जारी करण्यात आले.
अधिक वाचा : छत्रपती शिवाजी महाराज, शाहू महाराज, महात्मा फुले, डॉ. बाबासाहेब आंबेडकर संयुक्त जयंती समारंभ मंगळवारी
