नागपूर: नियमबाह्य पद्धतीने मोठ्या प्रमाणात दारुची विक्री केल्याप्रकरणात बजाजनगर पोलिसांनी प्रतापनगरमधील रजत वाइन शॉपच्या मालकासह चौघांविरुद्ध महाराष्ट्र दारुबंदी कायद्यान्वये गुन्हा दाखल केला आहे. दारु तस्करीप्रकरणात दोघांना अटक करण्यात आली होती. तपासादरम्यान पोलिसांनी हा गुन्हा दाखल केला.
महेश भोजराज इखार व राहुल टिकारामसिंग बैस, अशी अटकेतील तस्करांची नावे आहेत. पोलिस फरार अमित रहांगडाले याचा शोध घेत आहेत. बजाजनगर पोलिस स्टेशनचे वरिष्ठ पोलिस निरीक्षक राघवेंद्रसिंग क्षीरसागर यांच्या मार्गदर्शनाखाली हेडकॉन्स्टेबल संजयसिंग ठाकूर, शिपाई विनोद द्विवेदी, संजय, अनिल टिक्कस हे सावकरनगर भागात गस्त घालत होते. एम.एच.४९-एआर ६१८८ क्रमांकाचा ऑटोचालक संशयास्पदस्थितीत जाताना पोलिसांना दिसला. पोलिसांनी पाठलाग करून ऑटोचालकाला पकडले. ऑटोची झडती घेतली असता त्यामध्ये दीड लाख रुपये किमतीची विदेशी दारू आढळली. पोलिसांनी दोघांना अटक करून तपास सुरू केला. रजत वाइन शॉपमधून ही दारू खरेदी केली असून ती अमित याला पोहोचविण्यासाठी जात असल्याचे दोघांनी पोलिसांनी सांगितले. वाइन शॉप मालकाने परवाना नियमाचे उल्लंघन केल्याचे स्पष्ट झाल्याने पोलिसांनी मालकाविरुद्धही गुन्हा दाखल केला.
