नागपूर : उपराजधानीत ‘चोरी चोरी चुपके चुपके’ गुन्हेगारांचे जुगारअड्डे सुरू आहेत. पोलिस छापेही टाकतात. मात्र पोलिसांनी टाकलेल्या एका छाप्यात चक्क महिलाच जुगारअड्डा चालवित असल्याचे धक्कादायक वास्तव उघडकीस आले आहे. महिला महिलांसाठी चालवित असलेल्या या जुगारअड्ड्यामुळे पोलिसांनाही आश्चर्याचा धक्का बसला आहे. पोलिसांनी चार महिलांना अटक केली असून, दोन महिला फरार आहेत. पोलिस त्यांचा शोध घेत आहेत. सूत्रधार रेणू साधवानी, वीणा रिहानी, सीमा सिधवानी आणि ज्योती हरजानी सर्व रा. तेटिया चौक, दयानंदपार्क, असे अटकेतील महिलांची नावे आहेत. फरार महिलांपैकी एक महिलाही या अड्ड्याची सूत्रधार असून, तिच्याकडे जुगार खेळण्यासाठी महिला जमविण्याची जबाबदारी होती, अशी माहिती आहे.
पोलिसांनी दिलेल्या माहितीनुसार, रेणू साधवानी व त्यांचे पती भिसी चालवितात. भिसीच्या बहाण्याने नेहमी साधवानी यांच्याकडे वर्दळ असते. गत चार महिन्यांपासून रेणू या घरातच भिसीच्या बहाण्याने जुगारअड्डा चालवित होत्या. सुरुवातीला जुगार खेळणाऱ्या महिला रम्मी खेळायच्या. त्यानंतर ते पैशांवर ‘तीन पत्ती’ खेळायच्या. साधवानी यांच्याकडे नेहमी वर्दळ असते, येथे जुगार अड्डा चालतो, अशी माहिती जरीपटका पोलिसांना मिळाली होती. पोलिस उपायुक्त हर्ष पोद्दार यांच्या मार्गदर्शनाखाली वरिष्ठ पोलिस निरीक्षक पराग पोटे, पोलिस उपनिरीक्षक राहुल देवकर, हेडकॉन्स्टेबल मुन्ना ठाकूर, आसिफ शेख, रवी, वैशाली चरपे, रजनी रायपुरे आणि राजेश साखरे यांनी मंगळवारी सायंकाळी सापळा रचला. पोलिसांनी रेणू साधवानी यांच्या घरी छापा टाकला. यावेळी सहा महिला जुगार खेळत होत्या. दोन महिला संधी साधून मागील दरवाजाने तेथून पसार झाल्या. पोलिसांनी पत्ते व तीन हजार ६६० रुपये व अन्य साहित्य जप्त केले.
गुन्हे शाखा, विशेष पथक अनभिज्ञ?
शहरात कुठे काय सुरू आहे, याची खडानखडा माहिती असणारे गुन्हे शाखा पोलिस तसेच कारवाईत अग्रेसर असल्याचा दावा करणारे पोलिस उपायुक्तांच्या विशेष पथकाला या जुगार अड्ड्याबाबत माहिती नसल्याबाबत आश्चर्य व्यक्त करण्यात येत आहे. गुन्हे शाखा व विशेष पथकात महिला पोलिस कर्मचारी नसल्याने या अड्ड्यावर छापा टाकण्यास अडचणी येत होत्या, असे एका पोलिस अधिकाऱ्याने सांगितले.
अधिक वाचा : कुटुंबाशिवायही महिला करू शकतील ‘हज’
