नागपूर : अवैध सावरकाकडून व्याजासाठी होणारा छळ असह्य झाल्याने सराफाने विष प्राशन करून आत्महत्या केली. याप्रकरणी यशोधरानगर पोलिसांनी अवैध सावकार व प्रॉपर्टी डिलरविरुद्ध आत्महत्येस प्रवृत्त केल्याचा गुन्हा दाखल केला आहे.
आदित्य विनोद भुताड (वय २९, रा. सुंदरम अपार्टमेंट, भिलगाव) असे मृताचे, तर प्रणय गायकवाड (रा. भिलगाव) असे गुन्हा दाखल करण्यात आलेल्या प्रॉपर्टी डिलरचे नाव आहे. पोलिसांनी दिलेल्या माहितीनुसार, आदित्य याने व्यवसायासाठी प्रणयकडून ५० हजार रुपये घेतले. प्रणय हा आदित्यला व्याजासह ८५ हजार रुपयांची मागणी करीत होता. व्याज देण्यास असमर्थ असल्याचे आदित्यने प्रणयला सांगितले. त्यामुळे प्रणयने आदित्यला मारहाण करून ठार मारण्याची धमकी दिली. त्यानंतर तो सतत आदित्यचा मानसिक व शारीरिक छळ करायला लागला. या छळाला कंटाळून आदित्यने विष प्राशन केले.
खासगी हॉस्पिटलमध्ये उपचारादरम्यान त्याचा मृत्यू झाला. यशोधरानगर पोलिसांनी आकस्मिक मृत्यूची नोंद केली. तपासादरम्यान प्रणयच्या छळाला कंटाळून आत्महत्या केल्याचे समोर आले. पोलिसांनी आत्महत्येचा प्रयत्न केल्याचा गुन्हा दाखल केला. आदित्यने आत्महत्या केल्याचे कळल्यानंतर प्रणय हा भिलगावमधून पसार झाल्याची माहिती आहे.
अधिक वाचा : काश्मीर, लडाख झाले, पण वेगळा विदर्भ केव्हा? विदर्भावाद्यांचा सवाल
