नागपूर : तडीपार असतानाही नागपुरात वावरणाऱ्या गुंडांच्या शोधासाठी पोलिसांनी विशेष मोहीम आखली आहे. नागरिकांच्या मदतीने अशा तडीपारांना हुडकून काढून कठोर कारवाई करण्यासाठी आता तडीपार गुंडांचे होर्डिंग शहरातील मुख्य चौकांमध्ये लावण्यात येत आहेत. मानकापूरमधून या मोहिमेला सुरुवात झाली असून, आगामी काही दिवसांमध्ये शहरातील महत्त्वाच्या मुख्य चौकांमध्ये तडीपार गुंडांचे होर्डिंग दिसतील. त्यामुळे आता तडीपार गुंडांची खैर नाही, असे म्हटल्यास ते वावगे ठरू नये.
तडीपार असताना गुंड नागपुरात येऊन सुरक्षितस्थळी आश्रय घेतात. गुन्हे करून नागरिकांमध्ये दहशत पसरवितात व पसार होतात. वारंवार असा प्रकार करणाऱ्या तडीपार गुंडांची यादी पोलिसांनी तयार केली असून, यात ५० पेक्षा अधिक गुन्हेगारांचा समावेश आहे. त्यांचा संपूर्ण गुन्हेगारी अभिलेखही तयार करण्यात आला आहे. या गुंडांचे छायाचित्र असलेले होर्डिंग त्या-त्या भागांमधील मुख्य चौकांमध्ये लावण्यात येणार आहे. नागपूर पोलिसांची ही अभिनव कल्पना परिणामकारक ठरेल, अशी आशा व्यक्त करण्यात येत आहे. मानकापूरमधील सहा ठिकाणी तडीपार गुन्हेगारांचे होर्डिंग लावण्यात आले आहेत. शहरातील मुख्य चौकांमध्ये लावण्यात येणाऱ्या फलकावर गुंडाला कोणत्या भागातून तडीपार करण्यात आले. केव्हा तडीपार करण्यात आले. तडीपार करण्यात आल्याचा कालावधी किती, तडीपार गुंडाचा पत्ता याची संपूर्ण माहिती या फलकावर असणार आहे. या फलकावर पोलिस नियंत्रण कक्ष, संबंधित पोलिस स्टेशन व गुन्हे शाखेचा क्रमांक आहे. माहिती देणाऱ्या नागरिकांचे नाव गुप्त ठेवण्याची खबरदारीही पोलिसांकडून घेण्यात येणार आहे.
तडीपार असताना शहरात वास्तव्यास असणाऱ्या गुंडांना शोधून काढण्यासाठी पोलिसांकडून वेळोवेळी मोहीम राबविण्यात येते. मात्र कधी-कधी पोलिसांना तडीपार गुंड आढळून येत नाहीत. त्यामुळेच आता नागरिकांच्या मदतीने तडीपार गुंडांचा शोध घेण्यासाठी अशाप्रकारची मोहीम राबविण्यात येत आहे. गत काही महिन्यांमध्ये तडीपार असतानाही नागपुरात येऊन हत्या, हत्येचा प्रयत्न केल्याचे समोर आले आहे. काही दिवसांपूर्वीच तडीपार गुंडाने अजनी भागात एका युवकावर प्राणघातक हल्ला केला होता. अशा गुंडांना जेरबंद करण्यासाठी ही फलक मोहीम राबविण्यात येत आहे.
तडीपार असताना नागपुरात वास्तव करणाऱ्या गुंडांविरुद्ध कठोर कारवाई करण्यात येणार आहे. यासाठी नागरिकांची मदत घेण्यात येईल. मुख्य चौकांमध्ये तडीपार गुंडाची माहिती छायाचित्रासह फलकावर ठळकपणे प्रसिद्ध करण्यात येत आहे. सध्या मानकापूरमधील सहा ठिकाणी हे फलक लावण्यात आले आहे.
नीलेश भरणे – अतिरिक्त पोलिस आयुक्त, गुन्हेशाखा
अधिक वाचा : नागपूर – पूनम अर्बन क्रेडिट को-ऑपरेटिव्ह बँकेचा ग्राहकांना ४० लाखांनी गंडा
