नागपूर : गोंदिया- अंगणवाडी केंद्रातून गर्भवती महिला आणि किशोरवयीन मुलींना पोषण आहाराच्या पाकीटचे वाटप केले जाते. या पोषण आहाराच्या मसूरडाळीच्या पाकिटात मृत वटवाघूळाचे पिल्लू आढळल्याची संतापजनक घटना गुरुवारी सालेकसा तालुक्यातील बिजेपार येथे उघडकीस आली.
माहितीनुसार, बिजेपार येथील मायरा सचिन वाघमारे या मुलीला आठ दिवसांपूर्वी स्थानिक अंगणवाडीतून मसूरडाळीचे सीलबंद पाकीट देण्यात आले. ते फोडले असता आत वटवाघुळाचे मृत पिल्लू आढळले. त्यांनी लगेच या प्रकाराची माहिती जिल्हा परिषदेच्या महिला व बालकल्याण सभापती लता दोनोडे आणि सालेकसा पंचायत समितीचे उपसभापती दिलीप वाघमारे यांना दिली. या प्रकारामुळे अंगणवाडीतून वितरीत केल्या जाणाऱ्या पोषण आहारावर पुन्हा प्रश्नचिन्ह निर्माण झाले आहे.
पोषण आहाराच्या माध्यमातून आरोग्य सदृढ होण्याऐवजी उलट आरोग्य धोक्यात येत असल्याचे चित्र आहे. अंगणवाडीतून वितरीत करण्यात येणाऱ्या पोषण आहाराच्या पाकिटात कधी मृत पाल, तर कधी अळ्या लागलेला रवा आणि इतर साहित्य आढळल्याच्या घटना यापूर्वी उघडकीस आल्या आहेत. मात्र, यानंतरही पोषण आहाराचे पाकीट तयार करताना आवश्यक ती काळजी घेतली जात नसल्याचे बिजेपार येथील घटनेनंतर स्पष्ट झाले आहे.
हा तर आरोग्याशी खेळ
महिला व बालविकास विभागाद्वारे अंगणवाडीतील चिमुकले, गर्भवती महिला व किशोरवयीन मुलींचे आरोग्य सदृढ आणि उत्तम राहावे, यासाठी अंगणवाडी केंद्राच्या माध्यमातून पोषण आहाराचे नि:शुल्क वाटप केले जाते. मात्र, त्याची सुरक्षितता व त्याच्या दर्जाकडे दुर्लक्ष केले जात असल्याने हा महिला आणि मुलींच्या आरोग्याशी एकप्रकारचा खेळ असल्याचे मायराचे वडील सचिन वाघमारे हिने सांगितले.
कंत्राटदारावर कारवाई करण्याची मागणी
अंगणवाडी केंद्रातून पुरवठा करण्यात आलेल्या मसुरडाळीच्या पाकीटात वटवाघुळाचे मृत पिल्लू आढळले. त्यामुळे अंगणवाड्यांना पोषण आहाराचा पुरवठा करणाऱ्या संबंधित कंत्राटदारावर कारवाई करावी, अशी मागणी बिजेपार येथील गावकऱ्यांनी केली आहे. ‘अंगणवाडी केंद्रातून वितरीत करण्यात आलेल्या मसुरडाळीच्या पाकिटात मृत वटवाघुळाचे पिल्लू आढळल्याचा प्रकार गंभीर आहे. याप्रकरणाची सखोल चौकशी करण्याचे निर्देश विभागाच्या अधिकाऱ्यांना दिले असून संबंधित कंत्राटदारावर निश्चितच कारवाही केली जाईल’, अशी माहिती महिला व बालकल्याण सभापती लता दोनोडे यांनी दिली.
अधिक वाचा : नागपूर : म्हातारपण दाखविणारे अॅप एका दिवसात व्हायरल
