नागपूर : फूड डिलिव्हरी करणारी कंपनी स्विगी ब्लू कॉलर (शाररीक श्रम) जॉब देणारी सर्वात मोठी खासगी कंपनी ठरू शकते. आगामी १८ महिन्यात तीन लाख लोकांना रोजगार देऊ शकते. त्यानंतर कंपनीत काम करणाऱ्यांची संख्या ही पाच लाखाच्या घरात जाणार असल्याची माहिती आहे.
स्विगीचे सहसंस्थापक आणि सीईओ श्रीहर्ष मजेटी यांनी कंपनीच्या वार्षिक बैठकीत सांगितले की, स्विगीची वाढ अशीच कायम राहिल्यास देशात लष्कर आणि रेल्वेनंतर सर्वाधिक रोजगार देणारी कंपनी म्हणून नोंद होईल. सध्या भारतीय सैन्यात १२.५ लाख सैनिक कार्यरत असून रेल्वेत मार्च २०१८ अखेरीस १२ लाखहून अधिक कर्मचारी आहेत. तर, खासगी आयटी कंपनी टीसीएसमध्ये ४.५ लाख कर्मचारी आहेत. सध्या खासगी क्षेत्रात सर्वाधिक रोजगार देणारी कंपनी म्हणून टीसीएसचा लौकीक आहे. टीसीएसमध्ये सर्वाधिक इंजिनिअर काम करतात. सैन्य, रेल्वे आणि टीसीएसमध्ये कायमस्वरूपी रोजगार दिला जातो. तर, ब्लूकॉलर जॉब असलेल्या स्विगीमध्ये डिलिव्हरी कर्मचाऱ्यांना त्यांच्या कामाच्या आधारे पगार दिला जातो.
५०० शहरात कंपनीचा विस्तार
स्विगीचे सीईओ मजेटी यांनी सांगितले की, कंपनीचे वार्षिक मूल्य ३,३ अब्ज डॉलर झाली असून भारतातील ५०० शहरांमध्ये विस्तार झाला आहे. स्विगीकडे दरवर्षी सुमारे ५० कोटी ऑर्डर येतात. स्विगी सध्या ओपन पॉड्सचा विचार करत आहे. यामध्ये अनेक रेस्टोरंट एकाच किचनचा वापर करतील. याद्वारे ९९ टक्के ग्राहकांना १० मिनिटांत फूड डिलिव्हरी करण्याची स्विगीची योजना आहे. आगामी १०-१५ वर्षात १० कोटी ग्राहकांनी महिन्यात किमान १५ वेळेस स्विगीचा वापर करण्याचे लक्ष्य असल्याचे मजेटी यांनी सांगितले.
पीएफसारखे फायदे नाही
सध्या स्विगीमध्ये २.१ लाख मासिक डिलिव्हरी स्टाफ आहेत. तर, आठ हजार कॉर्पोरेट कर्मचारी पे-रोलवर आहेत. कर्मचारी पे-रोलवर नसल्यामुळे त्यांना पीएफ व इतर सुविधांपासून वंचित राहावे लागते.
कोणत्या कंपनीकडे किती डिलिव्हरी एक्झिक्युटीव्ह
‘ब्लू कॉलर जॉब’ देण्यामध्ये स्विगीची प्रतिस्पर्धी कंपनी झोमॅटोदेखील आहे. झोमॅटोमध्ये सध्या २.३ लाख डिलिव्हरी एक्झिक्युटीव्ह आहेत. तर, फ्लिपकार्टजवळ एक लाख डिलिव्हरी एक्झिक्युटीव्ह आहेत. त्याशिवाय अॅपबेस्ड कॅब सर्व्हिस देणाऱ्या ओला, उबरमध्येही हजारो लोकांना रोजगार मिळतो.
 जॉब देणारी सर्वात मोठी खासगी कंपनी ठरू शकते. आगामी १८ महिन्यात तीन लाख लोकांना रोजगार देऊ शकते.){kind=link}