लकडगंज स्मार्ट पोलिस स्टेशनचे लोकार्पण या हिवाळी अधिवेशनातच होईल, अशी अपेक्षा नागपूरकरांना होती. मात्र, यात ‘श्रेय’ आडवे आल्याने ही अपेक्षा फोल ठरली आहे. आता नेमका मुहूर्त निघणार केव्हा, या प्रतीक्षेत नागपूरकर आहेत.
२०१४मध्ये राज्यात स्मार्ट पोलिस स्टेशननिर्मितीचा निर्णय तत्कालीन सरकारने घेतला. नागपूरला प्राधान्य देण्यात येऊन लकडगंज पोलिस स्टेशनची निवड करण्यात आली. १४४ कोटी ९६ लाख रुपयांचा निधी या स्मार्ट पोलिस स्टेशनसाठी मंजूर करण्यात आला. दोन वर्षांत २६ हजार ८०० चौरस मीटर क्षेत्रफळात चारमजली स्मार्ट पोलिस स्टेशनचे बांधकाम करण्यात आले. बांधकाम झाल्यानंतर हिवाळी अधिवेशनादम्यान या पोलिस स्टेशनचे लोकार्पण होण्याची दाट शक्यता होती. मात्र, श्रेयाचा वादात हे लोकार्पण अडकले. त्यामुळे या स्मार्ट पोलिस स्टेशनच्या इमारतीतून लकडगंजचा कारभार सुरू होऊ शकला नाही. लोकार्पण न झाल्याने हे पोलिस स्टेशन आणखी किती दिवस धूळखात राहील, असा प्रश्न उपस्थित होत आहे.
सर्व सुविधायुक्त पोलिस स्टेशनसह येथे पोलिस उपायुक्त व सहाय्यक पोलिस आयुक्तांचे कार्यालय आहे. याशिवाय, याठिकाणी पोलिस निरीक्षक, उपनिरीक्षक व पोलिस कर्मचाऱ्यांसाठी सुसज्जित बारामजली इमारतही बांधण्यात येणार आहे. याठिकाणी व्यावसायिक संकुलासह क्लब व जिमही असेल. लकडगंज पोलिस स्टेशनमध्ये सौरऊर्जा प्रकल्प असून, याद्वारे ६५ किलोवॉट वीजनिर्मिती होणार आहे. मलजल प्रक्रिया केंद्रही येथे आहे. तसेच अद्ययावत अग्निशमन यंत्रणाही या ठिकाणी आहे.
वैशिष्ट्य असे…
-प्रकल्पाची प्रशासकीय मान्यता : १४४.९६ कोटी
-प्रकल्प पूर्ण करण्याचा कालावधी : २४ महिने
-जागेच क्षेत्रफळ : १९३६५ चौरस मीटर
-एकूण बांधकाम क्षेत्रफळ : १६८०० चौरस मीटर
-पोलिस उपायुक्त व सहाय्यक पोलिस आयुक्तांचे कार्यालय
-पोलिस कमर्चाऱ्यांसाठी ४४.०० चौरस मीटर चटई क्षेत्रफळाच्या ३०० सदनिका
-पोलिस निरीक्षकांसाठी ५० चौरस मीटर चटई क्षेत्रफळाच्या ४८ सदनिका
-व्यावसायिक संकुल, ५०० आसनव्यवस्था असलेले सभागृह
-क्लब हाउस, जिम्नॅशियम
-३ हजार चौरस मीटरची मोकळी जागा
-स्वतंत्र मलजल प्रक्रिया केंद्र
-सौरऊर्जेपासून ६५ किलोवॉट क्षमतेची वीजनिर्मिती
-अद्ययावत अग्निशमन यंत्रणा
