बिग बॉस विजेत्या शिव ठाकरेने मानले नागपूरकरांचे आभार

Shiv Thakre

नागपूरः ‘बिग बॉस’ च्या विजेतेपदात नागपूरकरांचा फार मोठा वाटा आहे. त्यासाठी समस्त नागपूरकरांचे खूप आभार मानतो’, असे म्हणत शिव ठाकरे याने नागपूरकरांचे स्वागत स्वीकारले. ९ सप्टेंबर हा शिवचा वाढदिवस असून ‘बिग बॉस’ची ट्रॉफी हे त्याच्यासाठी मोठे गिफ्ट ठरले आहे. ‘बिग बॉस सीझन २’ ची अंतिम फेरी रविवारी पार पडली. त्यात अमरावतीचा अभिनेता व कोरिओग्राफर शिव ठाकरे याला विजयी घोषित करण्यात आल्यानंतर वैदर्भीय जनतेमध्ये आनंदाची लाट उसळली आहे. सोमवारी नागपूर विमानतळावर शिवचे आगमन झाल्यानंतर त्याचे नागपूरकरांनी भव्य स्वागत केले. दक्षिण मध्य क्षेत्र सांस्कृतिक केंद्राचे सांस्कृतिक प्रतिनिधी कुणाल गडेकर यांनीही त्याचे स्वागत केले. त्यानंतर तो लगेच अमरावतीकडे रवाना झाला. त्याच्यासोबत त्याचे कुटुंबीय व मित्र परिवार होता.

शिव हा मागील शंभर दिवसांपासून ‘बिग बॉस’च्या चार भिंतीच्या आत होता. बाहेरच्या जगाशी त्याचा अजिबात संपर्क नव्हता. उत्तम खेळी करत असलेल्या शिवची बाहेर, सोशल मीडियावर मात्र भरपूर चर्चा होती. शिवच जिंकेल अशीही अनेकांना खात्री होती. ‘रोडीज’ या रिअॅलिटी शोमधे मिळालेले अपयश पुसून काढत बिग बॉसच्या विजेतेपदावर आपले नाव कोरले. शिव हा अभिनेता व कोरिओग्राफर आहे. त्याचा जन्म अमरावती येथे ९ सप्टेंबर १९८९ साली झाला. त्याचे वडील मनोहर ठाकरे यांचे किराणा दुकान व पानठेला होता. आई आशा ठाकरे या गृहिणी असून बहीण मनीषा इंजिनीअरिंग कॉलेजमध्ये प्राध्यापक आहे. त्याने अमरावतीच्या रायसोनी कॉलेजमधून इंजिनीअरिंगची पदवी घेतली आहे. शिवला अभिनेता व्हायचे होते. त्यानुषंगाने प्रयत्न करत असतानाच तो टेलीव्हिजन रिअॅलिटी शो एमटीव्ही रोडीज रायझिंगमध्ये पहिल्यांदा झळकला. पाच वर्षांपासून तो रोडीजसाठी प्रयत्न करीत होता. या शोमध्ये तो सेमिफायनलपर्यंत पोहोचला. पण, प्रत्येकवेळी विजेतेपदाने त्याला हुलकावणी दिली. मात्र, ती सल त्याने ‘बिग बॉस’ या शोतून भरून काढत विजेतेपद पटकावले आहे.

रोडीज सेलिब्रिटी झालो होतो. पण, आता मला ‘स्टार’ झाल्यासारखू वाटू लागले आहे. लोकांनी माझे बॅण्ड लावून स्वागत केले. त्यांनी अक्षरश: मला डोक्यावर घेतले. ‘बिग बॉस’ च्या ट्रॉफीसोबतच महेश मांजरेकर यांचा चित्रपट मिळाल्यामुळे गणपती बाप्पाने मला अॅडव्हान्समध्येच वाढदिवसाचे गिफ्ट दिले आहे. – शिव ठाकरे, ‘बिग बॉस’चा विजेता