नागपूर : मराठा समाजाला शिक्षणात १३ टक्के आणि नोकरीत १२ टक्के आरक्षण मिळाल्याचा आनंद आहे. या आरक्षणात विदर्भातील कुणबी समाजाचा समावेश करण्यात यावा, अशी मागणी विधानसभेतील विरोधी पक्षनेते विजय वडेट्टीवार यांनी सभागृहात केली. आरक्षणाच्या मुद्द्यावर घेण्यात आलेल्या अभिनंदन ठरावावर ते बोलत होते.
वडेट्टीवार म्हणाले, ‘मराठा समाजाला आरक्षण देण्याचा पाया आघाडी सरकारच्या काळात घातला गेला. चंद्रपूरसारख्या जिल्ह्यात मराठा कुणबी समाज मोठ्या संख्येने आहे. त्यांना ओबीसी कोट्यातून आरक्षण देण्यात येते. आता उच्च न्यायालयाने कुणबी समाजाच्या आरक्षणाला धक्का न लावता स्वतंत्र आरक्षण लागू केले आहे. त्यामुळे विदर्भातील मराठा कुणबी समाजाला ओबीसीऐवजी नव्या मराठा आरक्षण कोट्यातून आरक्षण देण्यात यावे.’
एसबीसी घटकाला मेडिकलच्या दोन टक्के आरक्षण देण्यास उच्च न्यायालयाचा विरोध किंवा बंधन नाही. त्यामुळे एसबीसी घटकाला मेडिकलमध्ये दोन टक्के आरक्षण देण्याचा निर्णय शासनाने घ्यावा, अशी मागणीही त्यांनी केली. यावर मुख्यमंत्री फडणवीस यांनी विरोधी पक्षनेत्यांनी दिलेली माहिती तपासण्यात येईल, अशी ग्वाही दिली.
अधिक वाचा : नागपूर : मराठा बांधवांचा विजयी जल्लोष
