नागपूर मेट्रो विस्तारास राज्य शासनाची मंजुरी

Nagpur Metro

नागपूर : उपराजधानीतील मेट्रोचा लाभ ग्रामीण भागातील जनतेला व्हावा, यासाठी राज्यकर्त्यांनी पुढाकार घेतला. आता ३३३ कोटी रुपयांच्या विस्ताराचा प्रकल्प अहवाल केंद्र सरकारकडे पाठवण्यात येणार असून, विस्ताराच्या प्रक्रियेला गती देण्यात येत आहे.

केंद्रीय मंत्री नितीन गडकरी यांनी मेट्रोच्या विस्तारासाठी प्रयत्न केले. त्यानंतर राज्याचे गृहमंत्री अनिल देशमुख हेदेखील सरसावले. नरखेड, वर्धा, रामटेक व भंडारा अशा चारही दिशांच्या ग्रामीण भागातील सर्व घटकांना मेट्रोचा लाभ घेण्यासाठी त्यांनी सातत्याने पाठपुरावा केला. महामेट्रोने तयार केलेला सविस्तर प्रकल्प अहवाल केंद्राकडे पाठवण्यास राज्याच्या नगरविकास विभागाने मान्यता दिली आहे.

नरखेड, वर्धा, रामटेक व भंडारा या ब्रॉडगेज मार्गावर वातानुकूलित ट्रेन धावणार आहेत. या प्रकल्पावर ३३३ कोटी ६० लाख रुपये खर्च अपेक्षित आहे. राज्य सरकारचे अर्थसहाय्य म्हणून २१ कोटी ३० लाख रुपये बिनव्याजी कर्ज म्हणून देण्यात येणार आहेत. याबाबत आदेश जारी करण्यात आल्याचे अनिल देशमुख यांनी स्पष्ट केले.

ग्रामीण भागात मेट्रोचा काटोल-नरखेड मार्ग सर्वात लांब ८५.५३ किलोमीटर आहे. यावर अकरा स्थानके राहतील. ७८.८ किलोमीटर लांब वर्धा मार्गावर ४१.६ किलोमीटर लांबीच्या रामटेक मार्गावर प्रत्येकी आठ स्थानके आहेत. भंडारा मार्गाची लांबी ६१. ७ किलोमीटर आहे. स्थानकांची संख्याही अकरा राहणार आहे.

ग्रामीण अर्थव्यवस्थेला लाभ

या प्रकल्पामुळे सर्व मार्गांवरील शहरे व गावे नागपूरशी जोडली जाणार आहेत. याचा लाभ ग्रामीण अर्थव्यवस्थेला होईल व लहान-मोठे उद्योगधंदे तसेच व्यवसायांना चालना मिळेल. त्यामुळे हा प्रकल्प लवकरात लवकर पूर्ण करण्याचे प्रयत्न असल्याचे गृहमंत्री अनिल देशमुख यांनी सांगितले.