नागपूर ‘बुध्दिस्ट थीम पार्क’ला मान्यता

नागपूर : कामठी येथील ड्रॅगन पॅलेसमध्ये साकारण्यात येणाऱ्या आंतरराष्ट्रीय बुध्दिस्ट थीम पार्क या प्रकल्पाला मुख्यमंत्री देवेंद्र फडणवीस अध्यक्ष असलेल्या शिखर समितीने मान्यता दिली. २१४ कोटी रुपयांचा हा प्रकल्प आहे. राज्याच्या सामाजिक न्याय विभागामार्फत निधीची व्यवस्था करण्यात येईल.

सह्याद्री अतिथीगृह येथे गुरुवारी मुख्यमंत्री देवेंद्र फडणवीस यांच्या अध्यक्षतेखाली बैठक झाली. याबैठकीला पालकमंत्री चंद्रशेखर बावनकुळे, सामाजिक न्यायमंत्री सुरेश खाडे, राज्यमंत्री अविनाश महातेकर, माजी राज्यमंत्री ॲड. सुलेखा कुंभारे आदी उपस्थित होते. या प्रकल्पाचे सादरीकरण मुख्यमंत्री फडणवीस यांच्यासमोर करण्यात आले. या प्रकल्पासाठी नोडल एजन्सी म्हणून एनएमआरडीएला नियुक्त करण्यात आले आहे.

प्रन्यासने सादर केलेल्या २१४ कोटीच्या अंदाजपत्रकाला पालकमंत्र्यांच्या अध्यक्षतेखालील जिल्हा नियोजन समितीने मान्यता दिली. ड्रॅगन पॅलेसला ‘अ’ वर्ग दर्जा देण्याची शिफारस करण्यात आली होती. ड्रॅगन पॅलेस या स्थळाला देशी-विदेशी पर्यटक मोठया प्रमाणात भेट देत असतात. या स्थळाचे आंतरराष्ट्रीय महत्त्व लक्षात घेऊन या प्रस्तावाला मान्यता देण्यात आली. बुध्दिस्ट थीम पार्क सोबत कन्व्हेन्शन सेंटरही येथे उभारण्यात येणार आहे.

असे असेल स्वरूप

थीम पार्क अंतर्गत विपश्यना केंद्र, मेडिटेशन सेंटरचे उदघाटन यापूर्वी राष्ट्रपतीच्या हस्ते झाले आहे. गौतम बुद्धांचा जन्म भारतात झाला तसेच गौतम बुद्धांचे तत्त्वज्ञान जापान, श्रीलंका, म्यानमार, थायलंड आदी देशांनी स्वीकारले आहे. थीम पार्कमुळे बुद्धांचे तत्त्वज्ञान स्वीकारलेले देश आणि भारतीय संस्कृतीचे आदानप्रदान होईल. यामुळे देशाचा विकास होण्यास मदत होईल.

प्रस्तावात ॲमीथिएटर, संगीत कारंजे, ॲम्युझमेंट पार्क, आर्ट ॲण्ड क्राप्ट सेंटर, निवास व्यवस्था, पार्किंग, शौचालये, व्हीआयपी निवास व्यवस्था कर्मचाऱ्यांसाठी निवास व्यवस्था, पर्यटकांसाठी निवास व्यवस्था, शॉपिंग कॉम्प्लेक्स, गौतम बुद्धांच्या जीवनावरील छायाचित्रांचे प्रदर्शन बुद्धिस्ट थीमवर आधारित बगिचा, बुद्धिस्ट कोर्ट आदींचा समावेश आहे.

अधिक वाचा : नागपुर एयरपोर्ट पर अर्मेनिया के प्रधानमंत्री निकोल