नागपूर: खापरी ते सीताबर्डी या मार्गाचे लोकार्पण केल्यानंतर तब्बल सहा महिन्यानंतर म्हणजे ७ सप्टेंबर रोजी लोकमान्यनगर ते सीताबर्डी या मार्गाचे लोकार्पण करण्यात येत असून या मार्गावरील मेट्रोला हिरवी झेंडी दाखविण्यासाठी पंतप्रधान नरेंद्र मोदी येणार आहेत. पंतप्रधानांचा नागपूरला येण्याचा कार्यक्रम आता जवळपास निश्चित झाला असून यासाठी प्रशासनही कामाला लागले असल्याचे विश्वसनीय सूत्रांनी सांगितले.
पंतप्रधान नरेंद्र मोदी यांनी ७ मार्च २०१९ रोजी खापरी ते सीताबर्डी या १३.५ कि.मी. मार्गाचे व्हिडीओ लिंकच्या माध्यमातून हिरवी झेंडी दाखवून लोकार्पण केले होते. यावेळी पंतप्रधानांनी नागपूरला यावे, अशी इच्छा मुख्यमंत्री देवेंद्र फडणवीस यांनी व्यक्त केली होती. याला उत्तर देताना प्रकल्पाचे काम पूर्ण झाल्यानंतर जूननंतर नागपूरला येणार असल्याचे मोदी यांनी सांगितले होते. त्यामुळे आता येत्या ७ तारखेला रिच-३चे लोकार्पण करण्यात येणार असल्याने या मार्गाच्या लोकार्पणासाठी पंतप्रधान मोदी येणार असल्याचे आता जवळपास निश्चित झाले असल्याचे विश्वसनीय सूत्रांनी सांगितले.
या कार्यक्रमाला मुख्यमंत्री देवेंद्र फडणवीस, केंद्रीय मंत्री नितीन गडकरी, पालकमंत्री चंद्रशेखर बावनकुळे, खासदार कृपाल तुमाने, डॉ. विकास महात्मे, महामेट्रोचे व्यवस्थापकीय संचालक ब्रिजेश दीक्षित आदी उपस्थित राहणार आहेत. पंतप्रधान येणार असल्याने प्रशासन तयारीला लागले आहे. जिल्हाधिकारी अश्विन मुद्गल, महामेट्रोचे वरिष्ठ अधिकारी यांनी शुक्रवारी कस्तूरचंद पार्कची पाहणी केली. ७ सप्टेंबर रोजी सायंकाळी ५.३० वाजता लोकार्पणाचा कार्यक्रम होणार आहे.
पंतप्रधान करणार मेट्रोने प्रवास
पंतप्रधान नरेंद्र मोदी नागपूर मेट्रोने प्रवास करणार आहेत. सुभाषनगर ते मुंजे इंटरचेंज स्टेशनदरम्यान मोदी मेट्रोने प्रवास करणार असल्याचे विश्वसनीय सूत्रांनी सांगितले. त्यानंतर मुख्य कार्यक्रम कस्तूरचंद पार्कवर होणार असून येथे सुमारे एक लाख नागरिकांना पंतप्रधान संबोधित करतील.
