बुलडाणा: गुरुवारी एकाच दिवशी पुन्हा पाच संशयितांचे रिपोर्ट पॉझिटिव्ह आल्याने जिल्ह्यातील बाधितांचा आकडा १७वर पोहोचला आहे. एकाच दिवशी रुग्णांच्या संख्येत पाचने वाढ झाल्याने नागरिकांसह आरोग्य यंत्रणेतही चिंतेचे वातावरण दिसून आले. बाधितांत शेगाव येथील दोन व खामगाव येथील एक, देऊळगाव राजामधील एक तर मलकापूरमधील एका रुग्णाचा समावेश आहे, अशी माहिती जिल्हा शल्यचिकित्सक डॉ. प्रेमचंद्र पंडित यांनी दिली. दिल्ली कनेक्शनमुळे जिल्ह्यातील करोना बाधितांचा आकडा तिप्पट झाला आहे. दरम्यान, बुधवारपर्यंत आयसोलेशनमध्ये दाखल असलेल्या ११ बाधितांवर आरोग्य यंत्रणा विशेष लक्ष ठेवून आहे.
जिल्ह्यातील करोनाबाधितांची संख्या दिवसेंदिवस वाढत असून दुहेरी आकड्यात जाऊन पोहोचल्याने नागरिकांत काहिसे चिंतेचे वातावरण आहे. त्यातच जिल्ह्यात एका बाधिताच्या मृत्यूची नोंद झाली आहे. दिल्लीच्या निजामुद्दीन परिसरातील मरकजमधून जिल्ह्यात परतलेल्या आणि त्यांच्या संपर्कातील आणखी काही हायरिस्क असलेले नमुने नागपूरला तपासणीसाठी पाठविण्यात येत आहेत. यात ५ एप्रिल रोजी चार जण एकाच दिवशी पॉझिटिव्ह आढळले होते. त्यानंतर ६ एप्रिल रोजी दोन, ८ एप्रिल रोजी एक आणि गुरुवारी पुन्हा पाच संशयितांचे रिपोर्ट पॉझिटिव्ह प्राप्त झाले आहेत.
बुधवारी संशयीतांचे ४४ नमुने तपासणीसाठी पाठविण्यात आले होते. त्यापैकी गुरुवारी ३२ नमुन्यांचे रिपोर्ट प्राप्त झाले असून २७ जण निगेटिव्ह तर ५ जणांचा अहवाल पॉझिटिव्ह आला आहे. गुरुवारी पुन्हा प्रयोगशाळेत १३ नमुने तपासणीसाठी पाठविण्यात आले आहेत.
आयसोलेशनमध्ये २५ जण
जिल्ह्यातील रुग्ण संख्या वाढत असून संशयितांच्या संख्येतदेखील त्यामुळे वाढ होत आहे. आयसोलेशन कक्षात सध्या २५ व्यक्ती दाखल असून त्यामध्ये खामगाव येथील ५, शेगांवमधील ९ व बुलडाण्यातील ११ व्यक्तींचा समावेश आहे. आतापर्यंत प्रयोगशाळेत जिल्ह्यातून एकूण १८२ नमुने पाठविण्यात आले आहेत. त्यापैकी १५७ नमुन्यांचे रिपोर्ट प्राप्त झाले आहेत. त्यामध्ये १७ पॉझिटिव्ह व १४० रिपोर्ट निगेटिव्ह प्राप्त झाले आहेत. २५ नमुन्यांच्या अहवालाची प्रतीक्षा आहे, अशी माहिती अतिरिक्त जिल्हा आरोग्य अधिकारी डॉ. सांगळे यांनी दिली.
बाधितांची आकडेवारी
बुलडाणा : ५ (एक मृत)
चिखली : ३
शेगाव : ३
खामगाव : २
देऊळगाव राजा : २
सिंदखेड राजा : १
मलकापूर : १
Also Read- नागपुरात ६ नवे कोरोनाबाधित रूग्ण सापडले
