नागपूर- ‘महिला, तरुणींच्या सुरक्षेसाठी पोलिस कटिबद्ध आहेत. महिला सुरक्षेला पोलिसांचे प्राधान्य असेल,’ अशी ग्वाही पोलिस आयुक्त डॉ. भूषणकुमार उपाध्याय यांनी दिली. श्री स्वामी समर्थ बहूद्देशीय संस्थेच्यावतीने ‘उडान एक नयी सोच, सॅल्युट नागपूर पोलिस’ या उपक्रमांतर्गत ज्येष्ठ सामाजिक कार्यकर्त्या व ज्येष्ठ गांधीवादी लीलाताई चितळे यांच्याहस्ते डॉ. उपाध्याय यांचा स्मृतिचिन्ह देऊन सत्कार करण्यात आला. यावेळी ते बोलत होते. पोलिस उपायुक्त निर्मला देवी, विनिता शाहू व संस्थेच्या अध्यक्षा नूतन रेवतकर यावेळी प्रामुख्याने उपस्थित होत्या.
डॉ. उपाध्याय म्हणाले, पोलिसांनी पुढाकार घेऊन महिला व तरुणींसाठी रात्री ९ ते पहाटे ५ वाजतापर्यंत ‘होम ड्रॉप’ हा उपक्रम सुरू केला आहे. या उपक्रमाचे देशभरात कौतुक होत आहे. या उपक्रमामुळे नागरिकांचा पोलिसांकडे बघण्याचा दृष्टिकोनही बदलला आहे. ‘होम ड्रॉप’ ही संकल्पना नूतन रेवतकर यांची मुलगी पूनम रेवतकर यांच्या नेतृत्वातील एका शिष्टमंडळाने दिलेल्या भेटीतून मिळाली, असेही आयुक्तांनी सांगितले.
७० टक्के गुन्हे रागाच्या भरात घडतात. चांगले बोलल्याने कोणताही वाद क्षणात मिटवता येतो. वाद कुठलाही असो शब्दांच्या जादुई शक्तीने भडकलेला जमावदेखील शांत होऊ शकतो. पोलिसांनी प्रत्येक नागरिकाशी नम्रतेने वागावे, असा सल्लाही डॉ. उपाध्याय यांनी उपस्थित पोलिस अधिकारी व कर्मचाऱ्यांना दिला. संस्थेने प्रथमच क्रांतिज्योती सावित्रीबाई फुले यांच्या जयंतीदिनी पोलिस अधिकाऱ्यांचा सत्कार घडवून आणला. ‘सीपी टू पीआय‘ अशी सत्काराची संकल्पना होती. यावेळी पोलिस उपायुक्त अनुक्रमे निर्मला देवी, विनीता शाहू, विवेक मसाळ, नीलोत्पल, राहुल माकणीकर, वाहतूक शाखेचे चिन्मय पंडित, पोलिस उपायुक्त (मुख्यालय) विक्रम साळी यांच्यासह सहाय्यक पोलिस आयुक्त व वरिष्ठ पोलिस निरीक्षकांचाही सत्कार करण्यात आला. संचालन आरजे मोना यांनी केले. प्रास्ताविक नूतन रेवतकर यांनी केले. डिम्पल सिंग या चिमुकलीने दिल्लीतील निर्भया प्रकरणावर ‘नारी’ ही कविता सादर केली.
