अमरावतीतील ‘त्या’ व्यक्तीचा मृत्यू करोनानेच; विदर्भातील दुसरा बळी

corona-death-in-amravati

अमरावती: अमरावतीत दोन दिवसांपूर्वी दगावलेल्या व्यक्तीचा करोना अहवाल आला असून त्यात त्याचा मृत्यू करोनानेच झाल्याचं उघड झालं आहे. अमरावतीतील हा पहिलाच करोना बळी असल्याने अमरावतीत खळबळ उडाली असून हा व्यक्ती राहत असलेला परिसर सील करण्यात आला आहे. या व्यक्तीचा करोना अहवाल पॉझिटिव्ह आल्यानंतर विदर्भातील करोना बळींची संख्या दोन झाली असून राज्यातील करोना बळीचा आकडा २७वर पोहोचला आहे.

या ४५ वर्षीय व्यक्तीला २ एप्रिल रोजी अमरावतीच्या जिल्हा सामान्य रुग्णालयात दाखल करण्यात आले होते. करोनाची लक्षणं आढळल्याने त्याच्यावर तात्काळ उपचारही सुरू करण्यात आले होते. मात्र, डॉक्टरांनी त्याला न्यूमोनिया झाल्याचं निदान केलं होतं. उपचार सुरू असतानाच त्याच दिवशी सकाळी साडे नऊ वाजता त्याचा मृत्यू झाला होता. आज पहाटे ३ वाजता त्याच्या करोना टेस्टचा अहवाल आला असून त्यात त्याला करोनाची लागण झाल्याचं स्पष्ट झालं आहे. त्यामुळे जिल्हा प्रशासनाने तो राहत असलेला हत्तीपुरा परिसर सील केला आहे. तसेच त्याच्या कुटुंबीयांना आणि शेजाऱ्यांना क्वॉरंटाइन करण्यात आले आहे. या शिवाय तो आणि त्यांचे कुटुंबीय ज्यांच्या ज्यांच्या संपर्कात आले होते, त्यांचाही शोध घेतला जात आहे.

मुंबईकर ऐकेनात; संचारबंदी मोडण्यात आघाडीवर!

दरम्यान, राज्यात करोना बळींची संख्या २७वर पोहोचली आहे. मुंबईत एकूण १८, पुणे, बुलडाणा आणि अमरावतीत प्रत्येकी एकाचा मृत्यू झाला आहे. तर राज्यात आतापर्यंत ४९० जणांना करोनाची लागण झाली आहे. यात मुंबईतील २७८ जणांचा समावेश आहे. गेल्या २४ तासांत राज्यात ६७ नवे करोना रुग्ण सापडले आहेत. काल दिवसभरात एकट्या मुबईतच ४३ रुग्ण सापडले, तर पुण्यात ११ रुग्ण आढळले असून नवी मुंबईत ८ रुग्ण सापडले आहेत. दिलासादायक बाब म्हणजे राज्यात आतापर्यंत ५०जण बरे झाले आहेत