जिल्ह्यात करोनाबाधितांच्या आकडेवारीत गेल्या काही दिवसांपासून सुरू असलेली घट रविवारीही कायम होती. दिवसभरात ६,५४४ रुग्ण करोनामुक्त झाले. त्यामुळे रुग्ण बरे होण्याची टक्केवारी ८६ टक्यांपर्यंत पोहोचली आहे. त्यातुलनेत दिवसभरात ३,१०४ नव्या बाधितांची नोंद करण्यात आली. तर ७३ मृत्यू नोंदवण्यात आले. शनिवारीही बाधितांच्या तुलनेत अर्ध्याहून अधिक रुग्ण बरे झाले होते.
काही दिवसांपूर्वी सुमारे आठ हजारांच्या आसपास दररोज नोंदवण्यात येणारी जिल्ह्यातील बाधितांची आकडेवारी गेल्या काही दिवसांपासून खाली आहे. रविवारी शहरात १,६१४, तर ग्रामीणमध्ये १,४७९ नव्या बाधितांची नोंद करण्यात आली. तर दिवसभरात ६,५४४ रुग्ण बरे होऊन घरी परतल्याने अॅक्टिव्ह रुग्णांच्या संख्येतही घट बघायला मिळत आहे. रविवारी जिल्ह्यात ५४ हजार ७३२ अॅक्टिव्ह रुग्ण होते. आतापर्यंत ३ लाख ८६ हजार २०१ रुग्ण करोनातून पूर्णपणे बरे झाले आहेत. जिल्ह्यात दिवसभरात १७ हजार ८३५ चाचण्या करण्यात आल्या.
रविवारी शहरात ४७, तर ग्रामीणमध्ये १५ मृत्यू नोंदवण्यात आले. जिल्ह्याबाहेरील रुग्णांच्या ११ मृत्यूंचाही यात समावेश आहे. त्यामुळे आतापर्यंत जिल्ह्यात करोनामुळे ८ हजार १४२ मृत्यूंची नोंद करण्यात आली.
जिल्ह्याची स्थिती
रविवारचे बाधित : ३,१०४
रविवारी बरे झालेले : ६,५४४
रविवारचे मृत्यू : ७३
अॅक्टिव्ह रुग्ण : ५४,७३२
