नागपूर: करोना विषाणूची साखळी गेल्या काही दिवसांपासून विदर्भा भोवती करकचून आवळली जात आहे. रविवारी एकाच दिवशी २० जणांचे नमूने पॉझिटिव्ह आल्याच्या संकटातून जाणाऱ्या नागपुरला सोमवारी मध्यरात्री नंतर आणखी एक धक्का बसला. त्यामुळे अर्धशतकाच्या दिशेने संत्रानगरीने आणखी एक पाऊल पुढे टाकत बाधितांचा आता आकडा ४८ वर पोचला.
सोमवारी मध्यरात्री प्राप्त अहवालानुसार करोना विषाणूचा अंश आढळलेला नवा रुग्ण वाडी येथील रहिवासी आहे. त्यामुळे आता करोना विषाणूच्या आणखी एक नवी साखळी जोडली जात आहे. आधी बजाज नगर, त्यानंतर खामला, जरिपटका, सतरंजीपूरा, मोमिनपूरा, काटोल रोड अशा चौफेर वाढणाऱ्या करोनाच्या साखळीत सोमवारी आता वाडी परिसराचीही भर पडली. त्यामुळे चोहो बाजूंनी करोनाचा विळखा वाढत असल्याने नागपूरकरांच्या चिंतेत दिवसागणिक वाढ होत आहे.
इंदिरा गांधी शासकीय वैद्यकीय महाविद्यालय व रुग्णालयात पॉझिटिव्ह आलेला हा रुग्ण काही दिवसांपूर्वी राजस्थान येथील अजमेर येथून परतला होता.
नागपुरात आल्यानंतर त्याला आमदार निवासातल्या सक्तीच्या एकांतवास कक्षात दाखल करण्यात आले होते. अजमेर येथील प्रवासादरम्यान आणखी एकजण त्याच्या सोबत होता. त्यामुळे आता या दोघांच्या सहवासात आलेल्यांची साखळी जोडून पाहिली जाणार आहे. मेयोतील खात्रीलायक वैद्यकीय सूत्रांकडून मिळत असलेल्या माहितीनुसार गेल्या ४८ तासांमध्ये करोनाच्या चाचणीत पॉझिटिव्ह आढळलेला हा २१ वा बाधित ठरला आहे. अर्धशतकाच्या दिशेने उपराजधानीने सोमवारी मध्यरात्रीच्या काळोखात आणखी एक पाऊल पुढे टाकले.
