नागपूर: करोना विषाणू जगाच्या पाठीवरील अनेक बलाढ्य देशांमधील सार्वजनिक आरोग्याला व्हेंटिलेटरवर पोहोचवित आहे. त्याने नागपुरात दस्तक देऊन मंगळवारी २१ दिवसांची साखळी पूर्ण केली. या मागच्या तीन आठवड्यांमध्ये करोनाबाधितांचा आकडा १६ वर येऊन पोचला असला तरी ज्या झपाट्याने तो वाढतो, त्याची गती मंदावण्यास मात्र उपराजधानीने आतापर्यंत अंशत: का होईना, यश मिळविले आहे. त्यामुळे या पुढील काळ खऱ्या अर्थाने नागपूरकरांसाठी कसोटीचा काळ ठरणार आहे. यातील आणखी समाधानाची बाब म्हणजे, २६ मार्चपासून सुरू असलेली करोनाबाधितांची साखळीदेखील मंगळवारी तब्बल १२ दिवसांनी खंडित झाली आहे.
दोहामार्गे अमेरिकेतून नागपुरात पोहोचलेल्या एका माहिती क्षेत्रातील अभियंत्याला सर्वांत पहिले ११ मार्चला करोनाची लागण झाल्याचे स्पष्ट झाले होते. त्यानंतर एका मागोमाग एक पहिल्या बाधित रुग्णाच्या संपर्कात आलेली त्याची पत्नी आणि त्याच्यासोबत अमेरिकेला गेलेले दोन सहकारी सलग दोन दिवस करोनाबाधित झाल्याचे स्पष्ट झाले. त्यामुळे नागपूरकरांचा जीव टांगणीला लागला होता.
बुलडाण्यात ‘त्या’ मृताच्या कुटुंबातील दोघांना करोना
सुदैवाने त्यांच्या संपर्कात आलेल्यांची साखळी मोडून काढण्यात यश आल्याने पुढचे १२ दिवस ही साखळी जोडली गेली नाही. बाधितांची संख्या पुढचे १२ दिवस चौकाराच्या पुढे जाऊ शकली नव्हती. तोवर २२ मार्चला पंतप्रधानांनी देशभर एक दिवसाचा लॉकडाउन जारी केला. या मधल्या काळात आंतरराष्ट्रीय विमानप्रवासावर मर्यादा आली तरी देशांतर्गत विमान वाहतूक सुरूच होती.
त्यामुळे नवी दिल्ली येथून प्रवास करून आलेल्या खामला भागातील एका व्यापाऱ्यामुळे ही खंडित झालेली लागण साखळी २६ मार्चला पुन्हा सुरू झाली. त्यापाठोपाठ एका मागे एक असे पुढचे सलग ११ दिवस करोनाबाधितांचा आकडा समोर येतच राहिला. यापैकी अवघ्या सहा दिवसांत संपर्कात आलेल्या १२ जणांना करोनाची लागण झाल्याचे निष्पन्न झाले. त्यात नवी दिल्ली येथूनच आलेल्या आणखी एका नव्या करोनाग्रस्ताने नागपूरकरांना लागलेला घोर पुन्हा वाढविला. त्यामुळे साखळी खंडित होईल, की नाही ही धास्ती नागपूरकरांना बसली असताना १२ दिवसांच्या खंडानंतर ही साखळी मोडण्यात मंगळवारी पुन्हा यश आले. सुदैवाने आतापर्यंत एकही रुग्ण सकारात्मक न आल्याने नागपूरकरांच्या जीवात जीव आला आहे.
‘त्या’ संशयिताचाही अहवाल निगेटिव्ह
या घडामोडीत सोमवारी सायंकाळी साडेचारच्या सुमारास इंदिरा गांधी शासकीय वैद्यकीय महाविद्यालय व रुग्णालयात करोनासदृश्य आजाराची लक्षणे घेऊन एक जण तपासणीसाठी आला. त्याचा इतिहास घेतला जात असतानाच अवघ्या दीड तासांत हा रुग्ण प्रकृती अत्यवस्थ झाल्याने दगावला. त्यामुळे संपूर्ण आरोग्य यंत्रणेची झोप उडाली. त्याच्या घशातील द्रवाच्या नमुन्याची तातडीने तपासणी केली असता त्याचा अहवाल नकारात्मक आला. त्यामुळे सर्वांनीच सुटकेचा श्वास टाकला आहे.
पुढचा टप्पा कसोटीचा
शहरात पहिला करोनाबाधित रुग्ण आढळल्यानंतर २१ दिवसांची साखळी पूर्ण झाली आहे. त्यामुळे पुढचा टप्पा हा समुदाय प्रादुर्भावाचा असू शकतो, असे आरोग्य क्षेत्रातील तज्ज्ञांचे मत आहे. असे झाल्यास गुणाकार पद्धतीने रुग्ण वाढण्याची जोखीम लक्षात घेता करोनाबाधित मूळ रुग्णाचा शोध घेणे आव्हान ठरणार आहे. त्यामुळे पुढचा टप्पा हा नागपूरकरांसाठी कसोटीचा ठरणार आहे. संवेदनशीलपणे लॉकडाउन पाळला तर ही साखळी मोडून काढता येणे शक्य होणार आहे. त्यामुळे प्रशासनदेखील ‘घरातच बसा, सुरक्षित रहा,’ असे आवाहन करीत आहे.
Also Read- कनिका कपूर ५ व्यांदा कोरोना पॉझिटिव्ह, डॉक्टर म्हणाले…
