नागपूर: जागा उपलब्ध न झाल्याने सुरू न झालेले डागा रुग्णालयातील शिवभोजन केंद्रही गुरुवारपासून सुरू झाले आहे. गोळीबाजार चौकाजवळ हे केंद्र सुरू झाले असून आता नागपुरातून दिवसाला ६०० शिवभोजन थाळीचे वितरण होणार आहे.
राज्यातील गरीब आणि गरजू जनतेला सवलतीच्या दरात जेवण उपलब्ध करून देण्यासाठी मुख्यमंत्री उद्धव ठाकरे यांच्या पुढाकारातून ‘शिवभोजन’ योजनेची अंमलबजावणी राज्यात २६ जानेवारी पासून सुरू करण्यात आली. नागपूर जिल्ह्यासाठी दिवसाला ७५० थाळी वितरित करण्याचे ठरविण्यात आले होते. गुणवत्तेचे निकष पूर्ण करणाऱ्या केंद्रांची यासाठी निवड करण्यात आली. मात्र डागा रुग्णालय आणि महाल येथील एका केंद्राला जागाच मिळाली नसल्याने दोन केंद्र सुरूच होऊ शकले नव्हते. ९ केंद्रांपैकी ७ केंद्र २६ जानेवारीला सुरू झाले. यात आता डागा रुग्णालयातील केंद्राची भर पडली आहे. डागा रुग्णालय परिसरात छत्रपती शिवाजी संस्थेचे केंद्र सुरू झाले आहे, लवकरच या ठिकाणी आणखी दुसरे केंद्र सुरू होणार आहे. महाल येथेही आणखी एक केंद्र सुरू होणार असल्याचे प्रशासनाकडून सांगण्यात आले.
कुठे किती वितरण
ठिकाण : केंद्राची संख्या : दिवसाला थाळी
डागा हॉस्पीटल : १ : ७५
गणेशपेठ बसस्थानक : २ : १५०
राष्ट्रसंत तुकडोजी महाराज कॅन्सर हॉस्पीटल : २ : १५०
कळमना मार्केट : २ : १५०
मातृसेवा संघाजवळ, महाल : १ : ७५
