नागपूर: शहराच्या विकासात नागरिकांचा प्रत्यक्ष सहभाग हा उद्देश आहे. यासाठी लोकप्रतिनिधी म्हणून नागरिकांच्या तक्रारी सोडविण्यासह त्यांच्या सूचना आणि संकल्पनांचा कसा उपयोग करता येईल यासाठी प्रयत्न करावे. नागपूर शहरासाठी अनेकांनी स्वप्न पाहिले आहे. त्यामुळे नागपूरला सर्वोत्तम करायचे असेल तर त्यादृष्टीने प्रत्येकाने कार्य करावे, असे आवाहन महापौर संदीप जोशी यांनी केले.
मनपा क्षेत्रातील झोननिहाय समस्या आणि त्याचे निराकरणासंदर्भात मंगळवारी महापौर जोशी यांनी लक्ष्मीनगर व धरमपेठ झोनमध्ये आढावा बैठक घेतली. यावेळी त्यांनी नगरसेवकांशी संवाद साधला. लक्ष्मीनगर झोन सभापती प्रकाश भोयर, माजी महापौर नंदा जिचकार, नगरसेविका सोनाली कडू, पल्लवी शामकुळे, वनिता दांडेकर, उज्ज्वला बनकर, नगरसेवक लखन येरवार तसेच धरमपेठ झोनमधील बैठकीत झोन सभापती अमर बागडे, नगरसेवक संजय बंगाले, निशांत गांधी, प्रमोद कौरती, कमलेश चौधरी, किशोर जिचकार, सुनील हिरणवार, नगरसेविका वर्षा ठाकरे, रूपा राय, प्रगती पाटील, रूतिका मसराम, उज्ज्वला शर्मा, शिल्पा धोटे, दर्शनी धवड आदी उपस्थित होते.
अतिक्रमणासाठी समिती
कचरा आणि अतिक्रमणाच्या समस्येबाबत प्रभागनिहाय आढावा घेण्यात आला. यावेळी ज्येष्ठ नगरसेवक दयाशंकर तिवारी यांच्या अध्यक्षतेत समिती तयार करण्यात येणार असल्याचे महापौर जोशी यांनी सांगितले. कचऱ्यासंदर्भात दोन एजन्सी नियुक्त करण्यात आल्या आहेत. त्याचा आढावा महापौरांनी घेतला.
स्वत:पासून सुरूवात करा
कचरा संकलनासाठी नव्या एजन्सीला नियुक्त केल्यानंतर नगरसेवकांनी आपल्या घरापासून ओला आणि सुका कचरा वेगळा करण्यास सुरूवात करावी, असे आवाहन जोशी यांनी केले.
