नागपूर : नागपूर-वर्धा थर्ड लाइनचे काम गेल्या अनेक दिवसांपासून सुरू आहे, हे खरे मात्र येत्या काही महिन्यातच या मार्गापैकी २० किलोमीटरचा मार्ग खुला करण्यात येणार असल्याची माहिती मध्य रेल्वेचे महाव्यवस्थापक डी.के. शर्मा यांनी पत्रपरिषदेत दिली. शर्मा मंगळवारी एक दिवसाच्या नागपूर विभाग दौऱ्यावर आले होते. सायंकाळी डीआरएम कार्यालयात त्यांनी पत्रकारांशी संवाद साधला.
वर्धा-नागपूर रेल्वे मार्गावरील वाहतूक प्रचंड वाढल्यानेच आधी थर्ड आणि नंतर फोर्थ लाइनची घोषणा करण्यात आली होती. त्यातील थर्ड लाइनचे काम जवळपास होत आले आहे. हे काम एकूण ७८ किलोमीटरचे आहे. त्यापैकी २० किलोमीटरचा मार्ग येत्या काही महिन्यात खुला करण्यात येईल. फोर्थ लाइनसाठी भूसंपादनाची प्रक्रिया सुरू आहे. त्यासाठी राज्य सरकारशी बोलणी होत आहे. एकूण पुढील दोन ते अडीच वर्षात थर्ड आणि फोर्थ अशा दोन्ही लाइनचे काम पूर्ण होईल, असा विश्वास शर्मा यांनी व्यक्त केला.
रेल्वेतील रिक्त जागांबाबत शर्मा म्हणाले की, आता नवनवे तंत्रज्ञान आले आहे. त्यामुळे कमीत कमी माणसात अधिकाधिक काम होणार आहे. सगळीच कामे आता माणसांकडून केली जाणार नाही. काळानुसार प्रत्येकालाच बदलावे लागेल. तरीही येत्या सहा महिन्यात भारतीय रेल्वेत १ लाख रिक्त जागा भरण्यात येणार आहेत.
मध्य रेल्वे आणि मेट्रो रेल्वे यांच्यातील कराराविषयी त्यांनी सांगितले की, मेट्रो रेल्वेच्या गाड्या चालविण्यासाठी आमच्यात करार झाला आहे व आम्ही ते स्वीकारले आहे. त्यासाठी कोचेस मेट्रो रेल्वे पुरविणार आहे. एलचबी कोचसाठीचा कारखाना आधी नागपूरजवळ होणार होता, याबात विचारले असता ते म्हणाले की, मुळात या कोचेसची सर्वाधिक गरज मुंबई व पुणे विभागात आहे. त्यामुळे या कोचेसची फॅक्टरी मुंबई आणि पुणे यांच्यामध्ये असणे सोईचे होऊ शकते.
या प्रकल्पासाठी किमान २०० हेक्टर जमीन लागणार आहे. तेवढी जमीन नागपुरात मिळण्याची शक्यता नसल्याचे ते म्हणाले. त्यामुळे हा प्रकल्प उभा करताना जागेची उपलब्धताही पाहिली जाईल, असे त्यांनी सांगितले. पत्रपरिषदेला मंडळ रेल्वे प्रबंधक उप्पल, मुख्य जनसंपर्क अधिकारी सुनील उदासी यांच्यासह रेल्वेचे अन्य वरिष्ठ अधिकारी उपस्थित होते.
अधिक वाचा : महामेट्रो चे व्यवस्थापकीय संचालक डॉ. ब्रिजेश दीक्षित यांनी घेतला मेट्रो प्रकल्पाच्या कार्याचा आढावा
