नागपूर : मकरसंक्रांतीनंतर तापमान हळूहळू वाढण्यास सुरुवात झालेली असतानाच गेल्या आठवड्यात अवकाळी पावसानंतर उपराजधानी परत एकदा गारठू लागली आहे. सोमवारी तर विदर्भातील काही ठिकाणी थंडीची तीव्र लहर पसरल्याचे हवामान खात्याने नमूद केले आहे. उपराजधानीत गेल्या २४ तासात ३.४ अंशांनी घसरण झाली असून परत एकदा कडाक्याची थंडी पडणार असल्याचा अंदाज वर्तविण्यात येत आहे. पुढील काही दिवस पारा १० पेक्षा खाली राहण्याचीही शक्यता वर्तविण्यात आली आहे.
रविवारी शहरात १४ अंश इतक्या किमान तापमानाची नोंद करण्यात आली. त्यानंतर सोमवारी पारा १०.८ वर घसरला. तसेच कमाल तापमानसुद्धा सामन्या तापमानापेक्षा ५ अंशांनी घसरले आहे. त्यामुळे सोमवारी दिवसासुद्धा थंडी जा‌णवत होती. नागपूरकरांनी दिवसासुद्धा गरम कपडे घालणे पसंत केले. या बदलामुळे आणि मुख्यत्वे थंड हवेमुळे आजारांमध्ये अचानक वाढ झाली आहे. सर्दी, खोकला आणि साथीचे आजार वाढले आहेत. ३० जानेवारीपर्यंत ढगाळ वातावरण राहणार असून नागरिकांनी थंडीपासून बचावासाठी योग्य ती काळजी घ्यावी, असा सल्ला डॉक्टरांनी दिला आहे. गेल्या आठवड्यात विदर्भाला अवकाळी पावसाने झोडपले.
बंगालचा उपसागर आणि प्रशांत महासागरात तयार झालेल्या कमी दाबाच्या पट्टामुळे देशात काही ठिकाणी वादळी पावसाने हजेरी लावली. या वादळी पावसाचा फटका विदर्भालाही बसला. या पावसामुळे शेतकऱ्यांचे प्रचंड नुकसान झाले. परंतु, आजारांमध्येसुद्धा वाढ झाली आहे. त्यामुळे शहरात थंडावा वाढला. त्यातच पश्चिमी विक्षोपामुळे उत्तरेकडील हिमवृष्टीत वाढ झाली आहे. त्यामुळे मध्य प्रदेश, छत्तीसगड आणि विदर्भातसुद्धा थंडीची लहर पसरली आहे.
पारा परत ४ वर?
२९ जानेवारी नागपुरात पारा चक्क ४ अंश सेल्सिअसपर्यंत घसरणार असल्याचा अंदाज बीबीसीतर्फे (ब्रिटीश ब्रॉडकास्टिंग कॉर्पोरेशन) वर्तविण्यात आला आहे. प्रादेशिक हवामान खाते तसेच केंद्रीय हवामान खात्यातर्फेसुद्धा येत्या पाच दिवसांत नागपूर तसेच विदर्भात शीत लहरीचा अंदाज व्यक्त करण्यात आला आहे. परंतु तापमान ९ अंशांपर्यंतच घसरणार असल्याचा अंदाज हवामान खात्याचा आहे. २९ डिसेंबर रोजी नागपुरातील तापमान ४ पर्यंत घसरणार असल्याचा अंदाज बीबीसीने व्यक्त केला होता. हा अंदाज खरा ठरला होता आणि तापमान ३.५ पर्यंत घसरले होते.
अधिक वाचा : Heavy rainfall likely in Vidarbha from 24th to 26th
