नागपूर : क्षुल्लक कारणावरून सहा जणांनी धारदार शस्त्रांनी वार करून २२ वर्षीय युवकाची हत्या केली. ही थरारक घटना पाचपावली परिसरात मंगळवारी रात्री घडली.
रूपेश कुंभारे (रा. मराठा चौक, बांगलादेश) असे मृतकाचे नाव आहे. याप्रकरणी पोलिसांनी खुनाचा गुन्हा दाखल करून दोन मारेकऱ्यांना अटक केली. तीन अल्पवयीन मुलांना ताब्यात घेतले. प्रवीण ऊर्फ गोलू वाघमारे (वय २५), गौरव गिरडे (वय २६) अशी अटकेतील मारेकऱ्यांची नावे आहेत.
रूपेश केशकर्तनालयात काम करायचा. मंगळवारी सायंकाळी रूपेश हा वेगाने मोटारसायकल चालवित होता. गोलू व गौरवने त्याला हटकले. रूपेशने त्या दोघांसोबत वाद घातला. तसेच त्याने दोघांनाही ठार मारण्याची धमकी दिली. रात्री १० वाजताच्या सुमारास गोलू, गौरव आणि त्याच्या साथीदारांनी रूपेशला गाठले. धारदार शस्त्रांनी वार करून त्याची हत्या केली व पसार झाले. याप्रकरणी पाचपावली पोलिसांनी खुनाचा गुन्हा दाखल करून दोघांना अटक केली. तिघांना ताब्यात घेतले. दोन दिवसांतील हत्याकांडाची पाचपावलीतील ही दुसरी घटना होय. यापूर्वी पिंकी शर्मा या तरुणीची हत्या करण्यात आली होती.
