नागपूर: करोनाचा प्रादुर्भाव वाढत असल्याने सतरंजीपुरा परिसराकडे साऱ्या नजरा वळल्या आहेत. दुसरीकडे करोना विषाणूशी कडवी झुंज दिलेल्या आठजणांनी या आजाराला पराभूत केले आहे. यापैकी सहा जणांना इंदिरा गांधी शासकीय वैद्यकीय महाविद्यालय व रुग्णालयातून (मेयो) तर दोन जणांना शासकीय वैद्यकीय महाविद्यालय व रुग्णालयातून सुटी देऊन घरी पाठविण्यात आले आहे.
आठही जणांच्या घशातील स्रावाच्या नमुन्यांमध्ये करोनाचा अंश न आढळल्याने त्यांना रुग्णालयातून घरी सोडण्यात आले आहे. यापैकी मेयोतून सुटी झालेले चारजण हे मध्य प्रदेशातील जबलपूर येथील रहिवासी आहेत. तर उर्वरित चारजण सतरंजीपुरा येथील रहिवासी आहेत. त्यामुळे करोनाने शहरात शिरकाव केल्यापासून आतापर्यंत या आजारावर मात करणाऱ्यांची संख्या आता ३२ झाली आहे.
दरम्यान, सतरंजीपुऱ्यातील करोनाबाधिताच्या सहवासात आलेल्यांचा आकडा वाढत असतानाच सोमवारी नागपूरला आणखी एक धक्का बसला. कर्करोगावरील उपचारांतर्गत सुरू असलेल्या किमोथेरेपीमुळे आधीच प्रतिकारशक्ती कमी झालेला रुग्ण करोनाबाधित असल्याचे निदान चाचणीतून झाले आणि चिंतेत भर पडली आहे. नव्याने पॉझिटिव्ह आढळलेला हा ४४ वर्षीय करोनाबाधित शांतीनगर झोनमधील उप्पलवाडी परिसरातील आहे. त्याला काही महिन्यांपूर्वी कर्करोगाचे निदान झाले होते. त्यामुळे त्याच्यावर कामठी मार्गावरील ऑटोमोटिव्ह चौकातल्या एचसीजी कॅन्सर रुग्णालयात उपचार सुरू होते. यादरम्यान त्याच्यावर १३ एप्रिलला शल्यक्रिया करण्यात आली. त्यानंतर २४ एप्रिलला तो शल्यक्रियेनंतरच्या उपचारासाठी कॅन्सर रुग्णालयात आला असता, ड्युटीवर असलेल्या डॉक्टरांना संबंधित रुग्णात करोनासदृश लक्षणे आढळली. त्यानंतर या रुग्णाच्या घशातील स्रावाचे नमुने खासगी प्रमाणिकरण लॅबमार्फत मुंबईच्या विषाणू प्रयोगशाळेकडे पाठविण्यात आले. त्याचा अहवाल रविवारी मध्यरात्री प्राप्त झाला. यात कर्करोगपीडिताला करोनाची लागण झाल्याचे स्पष्ट झाले. त्याला सोमवारी पहाटे मेयोच्या करोना वॉर्डात दाखल करण्यात आले. या घडामोडीत करोनाच्या धास्तीमुळे रुग्णालयातील आंतरररुग्ण विभागात भरती थांबविण्यात आली. त्यानंतर या रुग्णाला बाह्यरुग्ण विभागातच उपचार देण्यात आल्याचे सांगत रुग्णालय प्रशासनाने माहिती देण्याचे टाळले.
दरम्यान, महापालिकेच्या आरोग्य विभागाने खबरदारीचा उपाय म्हणून उप्पलवाडीतील बाधित रुग्णाच्या घराचा परिसर सील केला आहे. सोबतच, रुग्णालयातील बाह्यरुग्ण विभागाचेही काम पुढील सूचना मिळेपर्यंत थांबविण्याच्या सूचना दिल्या आहेत. मनपाचे पथक तडाफडकी रुग्णालयात पोहोचले असून संबंधित रुग्ण बाह्यरुग्ण विभागात कधी आला होता, त्याच्या सहवासात उपचारादरम्यान कोण कोण आले, तो ज्यावेळी रुग्णालयात आला त्यावेळी आणखी कितीजण तिथे उपस्थित होते. याची तपशीलवार माहिती गोळा करणे सुरू केले आहे.
Also Read- सतरंजीपुऱ्यातील नागरिकांची विलगीकरण कक्षात रवानगी
