नागपूर : साथीदार लांजेवार याच्या खुनाचा बदला घेण्यासाठीच समीर ऊर्फ बाबू ऊर्फ बाबा शेख रमजान शेख (वय २३) याची निर्घृण हत्या करण्यात आल्याची माहिती समोर आली आहे. समीर याच्या हत्येप्रकरणात यशोधरानगर पोलिसांनी सहा मारेकऱ्यांना अटक केली आहे. विजय नरेश पडोळे (वय १९, रा. पोळा मैदान), अजय सूरज चव्हाण (वय २२, रा. यादवनगर), आर्यन ऊर्फ गौरव मोहनलाल गुप्ता (वय २०, रा. प्रेमनगर), अंकुश उत्तम सूर्यवंशी (वय २१, रा. कांजी हाऊस चौक), प्रदीप ऊर्फ बंटी यादवराव कनपटे (वय १९, रा. कांजीहाऊस) व महेश ऊर्फ सोनू राजकुमार कुसेरे (वय २५, रा. बारनल चौक), अशी अटकेतील मारेकऱ्यांची नावे आहेत. सहा जणांनी मंगळवारी रात्री यशोधरानगरमधील आर. के. सावजी भोजनालयात धारदार शस्त्रांनी वार करून समीर याची हत्या केली होती.
मे २०१७ मध्ये समीर व त्याचा साथीदार फरदीन खान मुजीब खान ऊर्फ शेर खान या दोघांनी कुख्यात प्रवीण ऊर्फ प्रकाश (वय २२) याची हत्या केली. त्यामुळे प्रवीण याचे साथीदार संतापले होते. या प्रकरणात समीर व त्याचा साथीदार निर्दोष सुटले. खून प्रकरणात निर्दोष सुटल्यानंतर समीर हा परिसरात दादागिरी करायला लागला. रविवारी त्याने दुकानात घुसून अंकुश याच्या गळ्याला तलवार लावली. ठार मारण्याची धमकी दिली. त्यानंतर समीर याने विजय पडोळे याच्या घरावर हल्ला केला होता. यामुळे अंकुश व विजय संतापले. दोघांनी अन्य चार साथीदारांच्या मदतीने समीर याचा खात्मा करण्याचा कट आखला. मंगळवारी सकाळी त्यांनी दारु प्यायली. समीर याचा शोध सुरू केला.
रात्री वनदेवीनगर भागात समीर हा त्यांना आढळला. सहा जणांनी त्याच्यावर हल्ला केला. समीर पळाला. जीव वाचविण्यासाठी समीर हा आर. के. सावजी भोजनालयात घुसला. भोजनालयातच सहा जणांनी धारदार शस्त्रांनी वार करून समीर याला ठार केले व पसार झाले. याप्रकरणी यशोधरानगर पोलिसांनी हत्येचा गुन्हा दाखल केला. यशोधरानगर पोलिस स्टेशनचे वरिष्ठ पोलिस निरीक्षक डी. एस. साखरे निरीक्षक एन. एन. मोहिते , सहाय्यक पोलिस निरीक्षक खंदारे, पाटील, उपनिरीक्षक श्रीनिवास दराडे, सहाय्यक पोलिस उपनिरीक्षक विनोद सोलव, प्रकाश काळे, दीपक धानोरकर, नरेश, गजानन, नीलेश यांनी मारेकऱ्यांचा शोध सुरू केला. पोलिसांनी सीसीटीव्ही फुटेजची पाहणी केली. मारेकरी निष्पन्न होताच यशोधरानगर पोलिसांनी चौघांना तर पाचपावली पोलिस स्टेशनचे वरिष्ठ पोलिस निरीक्षक किशोर नगराळे यांच्या नेतृत्वात पाचपावली पोलिसांनी बंटी व महेश या दोघांना अटक केली. अटकेतील सहा मारेकऱ्यांना गुरुवारी न्यायालयात हजर करण्यात येईल.
छेड काढण्यास विरोध केल्याने वाठोड्यात हत्या
वाठोडा येथील मृत युवकाची ओळख पटविण्यात पोलिसांना यश आले असून, मानलेल्या बहिणीची छेड काढण्यास विरोध केल्यानेच युवकाची दगडाने ठेचून हत्या करण्यात आल्याचे उघडकीस आले. हिमांशू मनोहर डेंगे (वय २२, रा. अनमोलनगर), असे मृतकाचे नाव आहे. त्याची हत्या विकास नावाच्या युवकाने केली. पोलिस त्याचा कसून शोध घेत आहेत. मिळालेल्या माहितीनुसार, हिमांशू हा खासगी काम करीत होता. त्याची विकास याच्यासोबत मैत्री होती. विकास हा हिमांशूच्या मानलेल्या बहिणीची छेड काढायचा. हिमांशू याने त्याला विरोध केला. त्यामुळे विकास संतापला. मंगळवारी रात्री ८ वाजताच्या सुमारास गंगा सेलिब्रेशन हॉल परिसरात विकास याने हिमांशूची हत्या केली व पसार झाला.
————–
कॅप्शन- अटकेतील सहा मारेकऱ्यांसह यशोधरानगर पोलिस.
