नागपूर: मेट्रो स्टेशनपर्यंत पोहोचणे सहज शक्य व्हावे यासाठी महामेट्रोकडून मल्टी मोडल इंटिग्रेशन (फिडर सर्विस)ची सेवा पुरविण्यात येत आहे. सध्या ई-सायकल आणि पायडल सायकलची सेवा पुरविण्यात येत असून सुमारे ६५० नागपूरकर याचा वापर करीत आहे. ई-बाइकची सेवा लवकरच सुरू करण्याचा मानस असून परवाना मिळण्यासाठी राज्य सरकारकडे प्रस्ताव पाठविण्यात आला असल्याचे महामेट्रोकडून सांगण्यात आले.
प्रदूषण कमी करण्यासाठी अधिकाधिक नागरिकांनी ई-सायकल, पायडल सायकलचा वापर करावा असे आवाहन महामेट्रोकडून करण्यात आले. आजच्या स्थितीत शहरात एकूण ६५० ग्राहक सायकलचा वापर करत आहेत. यात ४० ई-सायकल आणि ५५०पेक्षा अधिक पायडल सायकल आहेत. सरासरी ५० सायकलची मागणी दर आठवड्याला वाढत आहे. सर्वच वयोगाटील नागरिक ई-सायकलचा वापर करत असून यामध्ये २० ते ३० या वयोगटातील तरुणांचा सहभाग अधिक आहे. अनेक ठिकाणी सायकलचा वापर होताना दिसत असून दिवसेंदिवस सायकलची मागणी वाढत आहे. नागपूर मेट्रोच्या स्थानकांवर नागरिकांना सायकलची सेवा उपलब्ध करून देण्यात आली आहे. यासह विविध खासगी कंपन्या, शाळा- महाविद्यालये, रहिवासी क्षेत्र अशा ठिकाणी बाइसिकलस उपलब्ध करून देण्यात आल्या असल्याचे महामेट्रोने सांगितले.
इथून मिळवा सायकल
लोकमान्यनगर स्थानक : १५
सुभाषनगर स्थानक : १५
इन्स्टिटयूट ऑफ इंजिनीयर्स : १५
सीताबर्डी इंटरचेंज : १५
जयप्रकाश मेट्रो स्थानक : १५
एअर पोर्ट मेट्रो स्थानक : १५
साऊथ एयरपोर्ट स्थानक : १५
खापरी मेट्रो स्टेशन : १५
बजेरिया : १
प्रियदर्शनी कॉलेज : २२
एचसीएल: ४
वॉकर्स स्ट्रीट : ३०
एम्स : १४
लक्ष्मीनगर : ११
केडीके कॉलेज : ६
हिंगणा मेट्रोडेपो : २०
३०० रुपयांत महिनाभर
पायडल सायकल महिनाभरासाठी ३०० रुपयांत उपलब्ध करून देण्यात येत आहे. ई-सायकलसाठी ६०० रुपयांचे शुल्क भरायचे आहे. ई सायकलचे चार्जिंग संपल्यानंतर त्याचा वापर पायडल सायकल म्हणून करू शकतो. मोबाइलसारखे ही सायकल घरी चार्ज करता येते. केवळ ओळखपत्र आणि निर्धारित केलेले शुल्क भरून ही सायकल वापरता येते, यासाठी कुठलेही डिपॉझिट भरण्याची गरज नाही. ही सायकल पंक्चर होत नाही, त्यात हवाही भरावी लागत नसल्याचे महामेट्रोकडून सांगण्यात आले.
गार्डनमध्ये मिळणार सायकल
शहरात अधिकाधिक ठिकाणी सायकल स्टॅण्ड सुरू व्हावे यासाठी महामेट्रोचे प्रयत्न सुरू आहेत. धंतोली पार्क, ट्राफिक पार्क, शंकरनगर गार्डन, छापरूनगरचे डॉ. आंबेडकर उद्यान या ठिकाणी सायकल स्टॅण्ड सुरू करण्यासाठी महामेट्रोने महापालिकाकडे प्रस्ताव पाठविला आहे. येत्या सहा महिन्यात शहरातील अधिकाधिक भागात असे स्टॅण्ड तयार करण्याचे प्रयत्न सुरू आहे.
एका रुपयात दहा मिनिट
स्मार्ट लॉक स्किमच्या माध्यमातूनही सायकल उपलब्ध होणार आहे. यात एका रुपयांत दहा मिनिट सायकल चालविता येणार आहे. बाउंस अॅपवर स्कॅन केल्यानंतर लॉक उघडेल. सायकल फिरविल्यानंतर स्टॅण्डवर सायकल ठेवल्यानंतर अॅपमधून ट्रिप एन्ड करावी लागेल, त्यानंतर किती शुल्क झाले त्यानुसार त्याचे दर आकारले जाणार आहे. ऑनलाइन पैसे भरण्याची सुविधाही उपलब्ध करून देण्यात येत असल्याचे महामेट्रोकडून सांगण्यात आले. या पद्धतीने सायकल घेतल्यास ‘ट्रिप एन्ड’ करायची असेल तर ती स्टॅण्डवरच होणार, इतर ठिकाणी कुठेही ‘ट्रिप एन्ड’ करता येणार नसल्याचे महामेट्रोने सांगितले.
