महाराष्ट्र राज्य पाठ्य पुस्तक मंडळाकडून शालेय विद्यार्थ्यांना देण्यात येणाऱ्या मराठी माध्यमातील पुस्तकात गुजराती भाषेचा वापर केल्याचा प्रकार समोर आला आहे. इयत्ता सहावीच्या भुगोलाच्या पाठ्यपुस्तकात गुजराती भाषेचा वापर करण्यात आला आहे. या प्रकारावरुन विरोधकांनी सत्ताधारी भाजपवर टीकेची जोरदार झोड उठवली आहे. गुजरातसमोर आणखी किती लाचारी पत्करणार, असा सवाल विरोधकांनी विचारला आहे.
राष्ट्रवादी काँग्रेसच्या आमदारांनी या मुद्द्यावरुन गोंधळ घातल्याने विधान परिषदेचे कामकाज अर्धा तासासाठी तहकूब करावे लागले. आज विधान परिषदेमध्ये मराठी भाषा समितीचा पहिला अहवाल सादर करण्यात येणार होता. तत्पूर्वी राष्ट्रवादीचे आमदार सुनील तटकरे यांनी मराठी माध्यमातील भुगोलाच्या पुस्तकात गुजराती भाषेचा वापर केल्याचा प्रकार सभागृहाच्या निदर्शनास आणून दिला.
सरकारने जाहीर माफी मागावी –
तटकरे यांनी गुजराती भाषेचे हे प्रकरण समोर आणताच राष्ट्रवादीचे आमदार आक्रमक झाले. गुजरातसमोर आणखी किती लाचारी पत्करणार, महाराष्ट्राचे गुजरातीकरण सुरू आहे, असा आरोप राष्ट्रवादीच्या आमदारांनी यावेळी केला. गुजराती भाषेचा वापर करून मराठी भाषेचा अपमान केला आहे. त्यामुळे सरकारने या प्रकाराबद्दल दिलगिरी व्यक्त करुन जाहीर माफी मागावी, अशी मागणी तटकरे यांनी सभागृहात केली. गुजरातीवरून सुरू झालेल्या या गदारोळामुळे विधान परिषदेचे कामकाज अर्धा तासासाठी तहकूब करण्यात आले होते.
राज्यातील शाळांमध्ये सर्व शिक्षा अभियानाअंतर्गत मोफत पाठ्यपुस्तक दिले जातात. महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळ, पुणे यांच्याकडून या पुस्तकांचे वितरण केले जाते. त्याप्रमाणे रायगड जिल्ह्यातील शाळेतही पुस्तके विद्यार्थ्यांना देण्यात आली होती. यातील इयत्ता सहावीच्या भुगोलाच्या पुस्तकामधील काही पानांवर गुजराती भाषेचा वापर केला असल्याचे तटकरे यांनी सांगितले. तसेच ही पुस्तके अहमदाबादमधील श्लोक प्रिंट सिटी येथे छापली जात असल्याचेही त्यांनी सांगितले. या सर्व प्रकारामुळे शिक्षण विभागातील गलथान कारभार समोर येत असल्याचे तटकरे म्हणाले.
तर याच सभागृहात मी विष घेऊन आत्महत्या करेन – तटकरे
त्या पुस्तकात एकही शब्द आणि पान गुजराती नाही. बाइंडिंगवाल्यांनी ती चूक केली असल्याची शक्यता असल्याचे सांगताना चंद्रकांत पाटील यांनी ‘गुजराती पाने असलेले पुस्तक आणि त्यातील पाने तुम्हीच जोडून आणली असल्याचा आरोप तटकरे यांच्यावर केला.
चंद्रकांत पाटलांच्या या आरोपाला उत्तर देताना तटकरे म्हणाले.. आयुष्यभरात असे काम कधी केले नाही, आम्ही छापून आणले आहे, असे जर सिद्ध झाले, तर याच सभागृहात मी विष घेऊन आत्महत्या करेन असा संतप्त पवित्रा तटकरे यांनी घेतला. त्यावर सभापतींनी असे काही बोलू नका, असा सल्ला तटकरेंना दिला. त्यावर ही चेष्टा नाही..माझे हे शेवटचे अधिवेशन आहे, त्यामुळे या प्रकरणाचा खुलासा होणे गरजेचे असल्याचे सांगत तटकरेंनी हा मुद्दा लावून धरला. त्यानंतर विरोधीपक्षाच्या आमदारांनी सभागृहात जोरदार घोषणाबाजी सुरू केली. त्यामुळे सभापतींनी परिषदेचे कामकाज दिवसभरासाठी तहकूब केले.
अधिक वाचा : खासगी शाळांमध्ये फी निश्चितीसाठी पहिल्यांदाच नियमावली तयार
