नागपूर- त्रिशरण पंचशील व २२ प्रतीज्ञा घेत शंभरावर ओबीसी बांधवांनी बुधवारी धम्मदीक्षा घेतली. धर्म व जात बदलताना या सर्वांना वेगवेगळे ‘बुद्ध’नाव धारण करण्यासाठी पर्याय देण्यात आला. वर्धा मार्गावरील उर्वेला कॉलनी येथील बानाई सभागृहात हा धम्मदीक्षा समारंभ झाला.
सकाळी मोठया संख्येत धम्मबांधवांतर्फे संविधान चौकातून धम्म रॅली काढण्यात आली. समारंभात अनेक राज्यातील धम्मबांधव मोठ्या संख्येत उपस्थित होते. आज मनुस्मृती दहन दिन होता. त्या पार्श्वभूमिवर विविध धर्माचा त्याग करून धम्मदीक्षा घेण्यात आली.
ओबीसी धम्मबांधव, सार्वजनिक धम्मदीक्षा समारोह समिती, नागपूर व सत्यशोधक ओबीसी परिषद, मुंबई यांच्या संयुक्त विद्यमाने या समारोहाचे आयोजन करण्यात आले होते. सकाळी ११ वाजता संविधान चौकातून धम्म रॅली काढण्यात आली. यात मोठ्या संख्येत धम्मबांधवांसह, ओबीसी समाजबांधवही उपस्थित होते. बानाई सभागृहात रॅली आल्यावर सर्वांचे स्वागत करण्यात आले. डॉ. बाबासाहेबांनी बौद्ध समाजाची गेल्या साठ वर्षातील प्रगती कोणत्याही नजरेत भरण्यासारखी आहे. नेमके हेच हेरून हनुमंतराव उपरे यांनी ओबीसी समाजात मोठी जागरूकता निर्माण केली. त्यानंतर ओबीसींकरीता धम्मदीक्षेचे अभियान सुरू केले. भारताच्या लोकसंख्येत ५२ टक्के ओबीसी आहेत. स्वातंत्र्य प्राप्तीनंतरही त्यांनी हिंदू धर्माची कास सोडली नाही. त्यांच्या जीवनात कुठलाही बदल झाला नाही. त्यामुळे आता ओबीसी बांधवांमध्ये धम्मदीक्षा घेण्याचे प्रमाण वाढले आहे. बुधवारी दुपारी झालेल्या धम्मदीक्षा सोहळ्यातही हेच चित्र होते. बानाई सभागृह हाऊसफूल्ल झाले होते. आत व बाहेरही मोठ्या संख्येत धम्मबांधव उपस्थित होते. धम्मदीक्षा घेण्याआधी सर्वांकडून अर्ज भरून घेण्यात आला. त्यानंतर त्यांना एक नामावली देण्यात आली. यात ‘बुद्ध ‘ नाव असलेली यादी देण्यात आली. त्यांच्या आवडीनुसार त्यांना नामबदलही करण्याची संधी देण्यात आली. काहींनी करूणानायके याप्रकारचे नावही धारण केले. भूमिपूक्ष नागवंशी शाक्य व इतरांनी धम्मदीक्षा घेणाऱ्यांकडून त्रिशरण पंचशील म्हणून घेतले. त्यांना धर्मांतर झाल्याचे प्रमाणपत्र देण्यात आले. बोधीवृक्ष, बुद्ध व त्यांचा धम्म पुस्तक देण्यात आले. ओबीसी धम्मविशेषांक, ओबीसी धम्मदीक्षा कॅलेंडर तसेच पंचशील दुपट्टा देण्यात आला.
मोठी उपस्थिती
मुंबई, गोंदिया, नवी दिल्ली, राजनांदगाव, गुजरात, राजस्थान येथील ओबीसी बांधवांनी हजेरी लावली. यासोबतच फ्रान्स येथून आलेल्या एका व्यक्तीनेही समारोहाला हजेरी लावत धमदीक्षा समजून घेतला. समारोहाचे अध्यक्ष डॉ. भीकरीयाडीपुत्र रमेशभीया राठोड होते. त्यांनीच या धम्मदीक्षा सोहळयाची माहिती दिली. संचालन व आभारही त्यांनी मानले. समारोहाला विचारपीठावर उल्हास राठोड, अरविंद माळी यांच्यासह अनेक मान्यवर उपस्थित होते.
