नागपूर: मनपाच्या परिवहन सेवेतून बाद झालेल्या जुन्या भंगार बसेसचा उपयोग करून त्यामध्ये महिलांसाठी प्रसाधनगृह निर्माण करण्याची संकल्पना मनपातर्फे राबविण्यात येणार आहे. यासंबंधी सुरुवातीला प्रायोगिक तत्त्वावर दोन बसेसमध्ये प्रसाधनगृह निर्माण केली जाणार आहेत. यामध्ये एक स्थायी तर दुसरे फिरते शौचालय निर्माण तयार करण्याच्या विषयावर गुरुवारी परिवहन समितीच्या सभेमध्ये चर्चा करण्यात आली.
सभेमध्ये परिवहन समिती सभापती नरेंद्र (बाल्या) बोरकर यांच्यासह समिती सदस्य अर्चना पाठक, विशाखा बांते, मनीषा धावडे, रूपाली ठाकूर, वैशाली रोहनकर, नागेश मानकर, नितीन साठवणे, उपायुक्त तथा परिवहन व्यवस्थापक राजेश मोहिते, प्रशासकीय अधिकारी रवींद्र पागे, श्रम अधिकारी अरूण पिपरुडे, सुकीर सोनटक्के, यांत्रिकी अभियंता योगेश लुंगे, प्रकाश जोशी आदी उपस्थित होते.
बोरकर यांनी परिवहन समिती सभापती म्हणून पदभार स्वीकारल्यानंतर परिवहन विभागाची पहिली सभा गुरुवारी झाली. नागपूर शहरातील महिलांसाठी व प्रवासी महिलांकरिता मोबाईल टॉयलेट योजना राबवून सुलभ प्रसाधनगृहाची व्याप्ती वाढविण्याकरीता मनपाच्या जुन्या भंगार बसचा वापर फिरते शौचालयाकरिता करण्याचे महापौर संदीप जोशी यांनी निर्देशित केले होते. त्यानुसार प्रायोगिक तत्त्वावर दोन बसमध्ये प्रसाधनगृहांची निर्मिती केली जाणार आहे. याबाबतचा निर्णय धोरणात्मक असून याविषयावर सभागृहामध्ये चर्चा करूनच अंतिम निर्णय घेण्यात येईल, असे यावेळी बोरकर यांनी सांगितले.
नवीन ४० इलेक्ट्रिक बसेस
केंद्र शासनाच्या पर्यावरणपूरक धोरणाप्रमाणे नागपूर महापालिकेच्या ‘आपली बस’ सेवेमध्ये नवीन ४० इलेक्ट्रिक बस नियुक्त करण्याचे प्रस्तावित आहे. पर्यावरणाच्या दृष्टीने उपयुक्त अशा नवीन इलेक्ट्रिक बसेसकरिता निविदाप्रक्रिया राबविण्यात येणार आहे. मात्र, संबंधित विषय धोरणात्मक असून याबाबत अंतिम निर्णय सभागृहामध्ये चर्चा करूनच घेण्यात येईल, असेही परिवहन समिती सभापती नरेंद्र ऊर्फ बाल्या बोरकर यांनी यावेळी सांगितले.