नागपूर: नागपूरकरांना चोवीस तास पाणी पुरवठा देण्याची प्रक्रिया प्रगतीपथावर आहे. डिसेंबर २०२० पर्यंत हा प्रकल्प पूर्णत्वास येईल, असा विश्वास जलप्रदाय समिती सभापती विजय (पिंटू) झलके यांनी केला. मंगळवार, २६ नोव्हेंबरला मनपा मुख्यालयातील स्थायी समिती सभागृहात जलप्रदाय समितीची बैठक झाली. त्याप्रसंगी त्यांनी माहिती दिली.
बैठकीला समिती उपसभापती भगवान मेंढे, नेहरूनगर झोन सभापती समिता चकोले, लकडगंज झोन सभापती राजकुमार साहू, आसीनगर झोन सभापती विरंका भिवगडे, मंगळवारी झोन सभापती गार्गी चोपरा, समिती सदस्य संजय महाजन, दीपक चौधरी, भुट्टो जुल्फेकार अहमद, वैशाली नारनवरे, अधीक्षक अभियंता (जलप्रदाय) श्वेता बॅनर्जी, कार्यकारी अभियंता मनोज गणवीर, ओसीडब्लूचे मुख्य कार्यकारी अधिकारी संजय रॉय, संचालक एचआर आणि जनसंपर्क केएमपी सिंग, संचालक राजेश कारला प्रामुख्याने उपस्थित होते.
सभापती झलके म्हणाले, २४ तास पाणीपुरवठा ही सेवा शहरात काही ठिकाणी सुरू करण्यात आली होती. काही ठिकाणी प्रतिसाद चांगला आला आहे. काही ठिकाणी काम करताना काही अडचणी असल्याने सेवेला उशीर होत आहे. सर्व अडचणी सोडविण्याचे काम प्रगतीप्रथावर सुरू असून पुढील वर्षभरात संपूर्ण शहराला २४ तास पाणी पुरवठा मिळेल, असे झलके यांनी सांगितले.
प्रारंभी सभापती पिंटू झलके यांनी शहरातील पाणी पुरवठा संबंधीचा झोननिहाय आढावा घेतला. हुडकेश्वर नरसाळा भागात पाणी पुरवठा व नळ जोडणीबाबतही आढावा घेतला. या भागात आतापर्यंत ओसीडब्लूमार्फत किती कामे झाली. किती नळ जोडणी करण्यात आली, याचा आढावा जलप्रदाय विभागामार्फत समितीपुढे सादर करण्याचे निर्देश सभापती झलके यांनी दिले. नेहरूनगर झोनमध्ये जलप्रदाय विभागामार्फत कामासाठी खड्डे खणण्यात आले आहेत, अशी तक्रार समिता चकोले यांनी केली. त्यावर बोलताना झलके यांनी विकास कामांसाठी केलेले खड्डे तातडीने बुजविण्याचे निर्देश दिले. धंतोली झोनअंतर्गत काही वस्त्यांमध्ये मीटर चोरून जाण्याची तक्रार मोठ्या प्रमाणावर असल्याचे निर्दशनास आले असल्याची माहिती झोनच्या डेलीगेट्सने दिली. मीटर चोरून नेण्याच्या तक्रारी असेल तर सरळ पोलिसात एफआयआर नोंदवावी, असे निर्देश सभापती झलके यांनी दिले.
गांधीबाग व आसीनगर झोनमध्ये लो-प्रेशर बाबत तक्रारी दिसून आल्या. यावर झलकेंनी लो-प्रेशर कशामुळे आहे, यावर काय उपाय करता येतील, याचा विचार करावा, असे सांगितले. गांधीबाग झोनमध्ये काही वस्तीत पाण्याची देयके अजूनही थकली आहेत. वसुली करण्यासाठी गेलो असता दम दिला जातो, अशी तक्रार आली, त्यावर बोलताना झलके यांनी पाणी कनेक्शन तातडीने काढण्याचे निर्देश दिलेत.
अमृत योजनेसंदर्भातील आढावा सभापती झलके यांनी घेतला. अमृत योजनेचे काम युद्धपातळीवर सुरू असून ऑगस्ट २०२० पर्यत अमृत योजनेचे काम पूर्ण होईल, असे अधीक्षक अभियंता श्वेता बॅनर्जी यांनी सांगितले. या योजनेमुळे डिसेंबर २०२० पर्यंत शहर टँकरमुक्त होईल, असा विश्वास सभापती झलके यांनी व्यक्त केला. जलप्रदाय विभागामार्फत घेण्यात येणाऱ्या गणेशोत्सव देखावा स्पर्धेमध्ये विजयी झालेल्या तीन गणेशोत्सव मंडळांना बक्षीसे वितरण करण्याचा कार्यक्रम महापौर कक्षात घ्यावा, अशी सूचना सभापती झलके यांनी केली.
‘अल्ट्रासॉनिक फ्लो मीटर’ बसविणार
नवेगाव व पेंच जलाशयातून उचल केलेल्या पाण्याची कुठेही गळती होते. याचे निदान लवकर होत नाही. त्यामुळे कुठेही काही अडचणी लक्षात याव्या, यासाठी अल्ट्रासॉनिक फ्लो मीटर लावण्यात येणार असल्याची माहिती सभापती झलके यांनी दिली. ३० किलोमीटरच्या पाइप लाइनवर ७ फ्लो मीटर लावण्यात येणार असल्याचे त्यांनी सांगितले.
५० विहिरींवर आरओ युनीट
उन्हाळा सुरू होण्यापूर्वी शहरातील ५० विहिरींवर आरओ युनिट लावण्यात येणार आहे. दहा झोनमधील पाच विहीरी अशा ५० विहीरी निवडण्यात आल्या आहेत. यात आरओ युनिट लावून त्यावर वॉटर एटीएम बसविण्यात येणार आहे. या कामाची निविदा प्रक्रिया पूर्ण झाली असल्याची माहिती कार्यकारी अभियंता (जलप्रदाय ) श्वेता बॅनर्जी यांनी दिली.
