नागपूर: करोना प्रादुर्भावाच्या दुसऱ्या लाटेला तोंड देताना शहरातील आरोग्य व्यवस्थेवर प्रचंड ताण आल्याने अनेक बाधितांना आवश्यक असलेल्या सुविधा मिळवताना अनेक अडचणी येत आहेत. यात ज्यांची ऑक्सिजन पातळी खालावते आहे त्यांना यासाठीचा सिलिंडर मिळवताना सर्वाधिक अडचण येत आहे. रुग्णांची अशी फरफट लक्षात घेत अशा रुग्णांसाठी नगरसेविका आभा पांडे तसेच शहरातील काही संस्थांच्या माध्यमातून उपलब्ध करून देण्यात आलेल्या ऑक्सिजन कॉन्स्ट्रेटर मशिन संजीवनी ठरू लागल्या आहेत.
करोनाचा प्रादुर्भाव वाढल्यानंतर रुग्णालयात खाटा मिळवण्यासाठी रुग्णांच्या नातेवाइकांची धडपड सुरू असल्याचे चित्र सर्वत्र दिसू लागले आहे. करोना प्रादुर्भावाच्या काळात शरीरातील ऑक्सिजनची पातळी कमी होत अनेकांना श्वसनाचा त्रास होत असल्याने ऑक्सिजन मास्क लावून त्यांना ऑक्सिजनचा पुरवठा करण्यात येतो. मात्र, सध्या एकूणच ऑक्सिजन बेड आणि ऑक्सिजन सिलिंडर यांचा चांगलाच तुटवडा निर्माण झाला आहे. मात्र, अशा परिस्थितीही शहरातील ज्येष्ठ नगरसेविका आभा पांडे यांनी उपलब्ध करून दिलेले ऑक्सिजन कॉन्स्ट्रेटर मशिन अनेकांसाठी वरदान ठरत आहे. विशेष म्हणजे पांडे यांच्या या प्रयत्नांमुळे अनेक रुग्णांचे प्राण वाचविण्यास मदत झाली आहे. ‘करोनाचा प्रादुर्भाव वाढल्यापासून प्रभागातील नागरिक, कुठे बेड मिळेल का, ऑक्सिजन सिलिंडर उपलब्ध होईल का, अशी विचारणा सतत करीत असत. असे मशिन ऑनलाइन मिळते असे कळल्यावर आम्ही सहा मशिन्स मागवल्या. या अत्यंत उपयोगी पडत आहेत. शहरातील एकूण परिस्थिती बघता आणखी सहा मशिन्स ऑर्डर केल्या आहेत’, असे पांडे यांनी ‘मटा’शी बोलताना सांगितले.
या मशिन ३ ते ५ लीटर किंवा त्यापेक्षा अधिक क्षमतेच्या असून केवळ प्लग लावून नोझल रुग्णाला तोंडावर लावण्यानंतर याचा सहज वापर करता येतो. पांडे यांची ही मशिन शारदा तिडके या ५३ वर्षीय महिलेसाठी वरदान ठरली आहे. या महिलेची ऑक्सिजन सॅच्युरेशन लेव्हल ८५ पर्यंत आली होती. पाच रुग्णालये फिरूनही कुठेही ऑक्सिजन बेड उपलब्ध झाला नाही. नगरसेविका पांडे यांच्याकडे याप्रकारच्या मशिन्स असल्याचे कळले. पांडे यांनी लगेच ती मशिन त्यांना उपलब्ध करू दिली. पुढील काही दिवसांत त्यांचे ऑक्सिजन लेव्हल सर्वसाधारण झाल्याचे त्यांचा मुलगा बिपीन तिडके यांनी सांगितले. या काळात पांडे यांनी इतर अनेक गृहविलगीकरणातील रुग्णांना या मशिन्स उपलब्ध करून दिल्या आहेत. त्यामुळे रुग्णांना मोठा दिलासा मिळाला आहे. या अत्यंत कठीण काळात रुग्णांसाठी मी काहीतरी करू शकले, याचे खूप मोठे समाधान असल्याचे पांडे यांनी सांगितले.
अनेक संस्थांकडून मशिन्स उपलब्ध ऑक्सिजनची आवश्यक्ता असलेल्या गृहविलगीकरणातील रुग्णांसाठी या मशिन्स अत्यंत उपयुक्त ठरत आहेत. त्यामुळे शहरातील रोटरी क्लब ऑफ नागपूर डाउनटाउन, माहेश्वरी युवक संघ आदी समाजसेवी संस्थांनी या मशिन्स उपलब्ध करून दिल्या आहेत.
