नागपूर: विचारांचे मंथन हीच खरी लोकशाहीची व्याख्या आहे. त्यामुळे विद्यार्थ्यांनी समाजाचे उत्थान व विकास धान्यात ठेवूनच कार्य करायला हवे. विद्यार्थ्यांमध्ये संपूर्ण राष्ट्राला प्रगतीपथावर नेण्याची योग्यता आहे, असे प्रतिपादन प्रसिद्ध अभिनेत्री व माजी खासदार जयाप्रदा यांनी केले.
रायसोनी समूहाच्यावतीने राष्ट्रीय छात्र संसदेचे आयोजन करण्यात आले. त्याच्या उद्घाटनप्रसंगी त्या बोलत होत्या. याप्रसंगी ज्येष्ठ पत्रकार मनीष अवस्थी, रायसोनी समूहाचे अध्यक्ष सुनील रायसोनी उपस्थित होते. जयाप्रदा यांनी विद्यार्थी हेच राष्ट्राला नव्या उंचीवर नेण्यासाठी प्रयत्न करू शकतात, असे नमूद केले. विद्यार्थ्यांनी सतत यासाठी प्रयत्न करावा, असे आवाहन त्यांनी केले. यावेळी सुनील रायसोनी यांनी या संसदेचे महत्त्व विषद केले.
छात्रसंसदेच्या पहिल्या सत्रात ‘ट्रिपल तलाक- सजा या आजादी’ या विषयावर चर्चासत्राचे आयोजन करण्यात आले होते. यामध्ये भाजपच्या प्रवक्त्या अनिला सिंग, शहजाद पुनावाला, इस्लामिक शोधकर्ता इलियास अझीमुद्दीन व तिहेरी तलाक पीडित महिला फरहिन सहभागी झाले होते. चर्चासत्रादरम्यान शहजाद यांनी तिहेरी तलाक ही मुस्लिम समाजातील अनिष्ट प्रथा आहे. त्यामुळे तिहेरी तलाकच्या कायद्यामुळे मुस्लिम महिलांना आता संरक्षण मिळाले आहे. अनेक वर्षांपासून मुस्लिम समाजाचा वापर केवळ राजकीय लाभासाठी करण्यात येत आहे. या समाजाच्या समस्या सोडवण्यासाठी कोणीही प्रयत्न केलेले नाहीत, असे सांगितले. अनिला सिंग यांनी जुन्या अनिष्ट प्रथा-परंपरा, चालीरितीना संपवणे प्रत्येकाचे कर्तव्य असल्याचे आवाहन केले. मोहम्मद अझीमुद्दिन यांनी तिहेरी तलाकमध्ये तीन वर्षाची शिक्षेची तरतूद शोषितेच्या परिवाराला सामाजिक व आर्थिक रुपाने दुर्बल करणारी आहे. शासनाने यावर फेरविचार करायला हवा, असे आवाहन केले. कार्यक्रमात तिहेरी तलाक पीडित महिलेने तिचे किस्से सांगितले. कार्यक्रमाचे सूत्रसंचालन श्वेता शेलगावकर यांनी केले. तर चर्चासत्राचे सूत्रसंचालन ज्येष्ठ पत्रकार व टीव्ही अँकर दिनेश गौतम यांनी केले.
