नागपूर: नागपूरचे प्रसिद्ध बालरोगतज्ज्ञ डॉ. सतीश देवपुजारी यांची कन्या डॉ. संजिरी व जावई कौस्तुभ निर्मल यांचे अमेरिकेतील कॅलिफोर्निया येथे डाइव्ह बोटला लागलेल्या आगीत होरपळून निधन झाले. संजिरी या दंतरोगतज्ज्ञ होत्या तर कौस्तुभ एका फायनान्स कंपनीत कार्यरत होते.
कॅलिफोर्निया राज्यातील लॉस एंजेलिसच्या उत्तर भागातील सांताक्रुझ बेटाच्या परिसरात सोमवारी जहाजाला आग लागली होती. या दुर्घटनेत ३४ जणांचा मृत्यू झाल्याची भीती वर्तविण्यात येत असून आतापर्यंत ३० मृतदेह बचावपथकाच्या हाती लागले आहेत. कॅप्टनसह पाच क्रू सदस्य या दुर्घटनेतून वाचले आहेत.
डॉ. सतीश देवपुजारी यांची मुलगी व जावयाच्या झालेल्या दुर्दैवी मृत्यूमुळे नागपूरच्या वैद्यकीय क्षेत्राला धक्का बसला आहे. सर्व मृतदेहांची दहा दिवसांनंतर डीएनए चाचणी करण्यात येणार असून त्यानंतरच ते त्यांच्या कुटुंबीयाच्या हाती सोपविण्यात येणार आहेत. डॉ. सतीश देवपुजारी त्याकरिता कॅलिफोनियाकडे रवाना झाले आहेत.
