नागपूर : उपराजधानीत उष्माघाताने मृत्यू होणाऱ्यांची संख्या दिवसेंदिवस वाढत असून विविध ठिकाणी ११ जणांचे मृतदेह आढळून आले. सर्वांचा मृत्यू उष्माघाताने झाल्याची भीती व्यक्त करण्यात येत आहे. उष्माघाताने मृत्यूमुखी पडलेल्यांची संख्या आता ६४ वर गेली आहे.
नंदनवन भागातील मैदानात सोमवारी दुपारी २६ वर्षीय रावन कबीराम कुडू रा. वाठोडा याचा मृतदेह आढळला. छोटा ताजबाग परिसरात ६० वर्षीय अनोळखी महिलेचा मृतदेह आढळून आला. तहसीलमधील पिवळी मारबत चौक येथे ४० वर्षीय इसमाचा मृतदेह आढळला. मृताची ओळख पटलेली नाही.
गोळीबार चौकातील योगेश ज्वेलर्ससमोर ६० वर्षीय श्रावण जगन्नाथ निमजे रा. तांडापेठ यांचा मृतदेह आढळला. तहसीलमधील गांधीबाग येथील कालामाता मंदिरासमोर ४० वर्षीय अनोळखी इसमाचा मृतदेह आढळला. बजाजनगर चौकात ४५ वर्षीय इसमाचा मृतदेह आढळून आला. मेडिकल कॉलेज हॉस्पिटल परिसरात ६० वर्षीय ज्येष्ठ नागरिकाचा मृतदेह आढळला. प्रतापनगरमधील राजूनगर भागात ५० वर्षीय अनोळखी इसमाचा मृतदेह आढळून आला. जरीपटक्यातील प्रभात कॉलनी भागातील मोकळ्या भूखंडावर ७० वर्षीय सुरेंद्र भिकाजी शंभरकर रा. मानवनगर यांचा मृतदेह आढळला. पाचपावलीतील लालबहादूर शास्त्री उद्यानात ६० वर्षीय अनोळखी ज्येष्ठ नागरिकाचा मृतदेह आढळून आला. गणेशपेठेतील क्रीडा संकुलसमोर ४५ वर्षीय अनोळखी इसमाचा मृतदेह आढळून आला. या प्रकरणी पोलिसांनी आकस्मिक मृत्यूची नोंद करून तपास सुरू केला आहे.
अधिक वाचा : पारा फिर 47 डिग्री सेल्सियस के पार
